Gənc Xəzər Mühəndisləri İctimai Birliyinin (XMİB) universitet tələbələri üçün təşkil etdiyi Yay Mühəndislik Məktəbi başa çatdı. Ənənəvi olaraq tədbir Qafqaz Universitetində keçirildi. 29 iyun - 5 iyul tarixlərində təşkil edilən Yay məktəbində yerli və xarici ölkə universitetlərində təhsil alan 20 tələbə iştirak edib. Onlar bu hüququ iki mərhələli seçim - test və müsahibə turlarından keçərək qazanıblar.

Bu layihə Xəzər Mühəndisləri İctimai Birliyinin keçirdiyi dördüncü mühəndislik məktəbidir. Layihənin həyata keçirilməsində əsas məqsəd tələbələrə nəzəri biliklərlə yanaşı, real istehsalat sahələrində baş verən prosesləri aşılamaq, onların komanda şəklində işləmə qabiliyyətlərini inkişaf etdirmək, bir sözlə, regionda mühəndisliyin inkişafına müsbət təsir göstərməkdir. Proqram çərçivəsində bir həftə ərzində müxtəlif yerli və xarici şirkətlərdə çalışan mühəndislərin informasiya-kommunikasiya texnologiyaları, neft, kimya və proses mühəndisliyi, liderlik qabiliyyətləri, layihələrin idarə edilməsi və digər mövzularda seminarları təşkil olunub. Layihənin həyata keçirildiyi müddət ərzində müxtəlif komanda oyunları, bilik yarışları keçirilib, iştirakçılar ayrı-ayrı sənaye müəssisələrinə ekskursiyalara gediblər.  

Hicran ƏKBƏROVA