Şirvan Şəhər Təhsil Şöbəsi metodkabinetinin müdiri Elçin Həsənovdan bu günlərdə aldığımız məlumatda bildirilir ki, respublikamızın bütün regionlarında olduğu kimi, Şirvan şəhər ümumtəhsil məktəblərinin beşinci siniflərində dərs deyəcək  müəllimlər üçün də yeni fənn kurikulumlarının tətbiqi ilə əlaqədar təlim kursları keçirilib. Həmin kursların səmərəli təşkili üçün Şirvan şəhərində texniki avadanlıqlarla təchiz edilmiş məktəblərdə 4 təlim mərkəzi yaradılmışdır.

Şəhər 18 nömrəli təbiət-humanitar təmayüllü məktəbdə ana dili, təsviri incəsənət və musiqi, şəhər 10 nömrəli tam orta məktəbdə xarici dil, şəhər 11 nömrəli tam orta məktəbdə riyaziyyat, informatika və Azərbaycan tarixi, şəhər 1 nömrəli tam orta məktəbdə isə həyat bilgisi, texnologiya və fiziki tərbiyə fənləri üzrə təlimlər təşkil olunmuşdur.

Təlim kurslarını Azərbaycan, Xəzər universitetlərinin və "Mədəd" təşkilatının əməkdaşları yüksək səviyyədə aparıb. Bunun nəticəsidir ki, ana dili, təsviri incəsənət, musiqi, həyat bilgisi, texnologiya, fiziki tərbiyə və xarici dil fənləri üzrə yekunlaşmış kurslarda müəllimlərin həm iştirak, həm də bilik reytinqi yüksək qiymətləndirilib. Riyaziyyat, informatika və Azərbaycan tarixi fənləri üzrə isə kurslar 11 və 12 iyul tarixlərində yekunlaşıb.

Ümumilikdə şəhərin 219 müəllimi yüksək təlim kursu keçərək birinci və ikinci dərəcəli sertifikata layiq görülüb. 

ƏDALƏT