Müəllimlik hər zaman müqəddəs sənət kimi sayılıb. Dahilər müəllimlərini özlərindən üstün bilib, onları elm yolunda bir çıraq adlandırıblar. Ömrünün 42 ilini müəllimliyə həsr edən Tapdıq Abbasov da indiyədək neçə-neçə vətən övladının həyat yoluna elm çırağı tutub. Bu günlərdə 65 yaşı tamam olan Tapdıq müəllimin ən böyük qazancı da yetirmələrinin əməyinə verdiyi  yüksək qiymət, el hörməti olub. Bu hörməti o özü işə möhkəm bağlılığı, məsuliyyəti ilə əlaqələndirir.   Tapdıq Abbasov 1947-ci ildə Laçın rayonunun Güləbird kəndində anadan olub. 1954-1961-ci illərdə Novruzalılar kənd 7 illik orta məktəbində təhsil alıb. 8-11-ci sinifləri Qubadlı rayonunun Muradxanlı kənd orta məktəbində oxuyub. 1965-1970-ci illərdə Azərbaycan Pedaqoji İnstitutunun təbiət və biologiya fakültəsində ali təhsil alıb. 1970-ci ildən pedaqoji fəaliyyətə başlayıb. Hazırda Laçın rayon Güləbird kənd tam orta məktəbinin direktorudur. O illəri Tapdıq müəllim belə xatırlayır:

-Ucqar dağ kəndlərində əmək fəaliyyətimə başlamışam. İlk iş yerim Laçın rayonunun Cağazur kənd orta məktəbi olub, burada bir il fəaliyyət göstərmişəm. 1971-ci ildə hərbi xidmətə yollandım və 1972-ci ildə ordudan tərxis olunub geriyə - rayonumuza qayıtdım. Bu dəfə Laçın rayonunun ucqar dağ kəndi olan Vağacil kəndində işləməyə başladım. 1977-78-ci tədris ilində ailə vəziyyətimlə əlaqədar doğma kəndimiz Güləbirdə qayıtdım və buradakı orta məktəbdə əvvəl müəllim, sonralar isə hərbi rəhbər vəzifələrində çalışdım. 1985-ci ildə irəli çəkilərək məktəb direktoru təyin olundum.

1988-ci ildə Qarabağ hadisələri başlandı, sonralar genişlənən müharibə nəticəsində Laçın rayonu işğal edildi. O dövrdə Tapdıq müəllim ailəsi ilə birlikdə Sumqayıt şəhərində məskunlaşdı. 1993-94-cü tədris ilində Güləbird kənd orta məktəbi Sumqayıt şəhərində müvəqqəti olaraq təşkil olundu və məktəbin müəllim heyəti öz fəaliyyətini davam etdirməyə başladı.

Tapdıq müəllim Güləbird kənd tam orta məktəbinə rəhbərlik etdiyi müddətdə özünü bacarıqlı təhsil təşkilatçısı, kollektivin hamı tərəfindən qəbul olunan lideri kimi göstərə bilib. Onun səyləri nəticəsində məktəbdə yüksək təhsil mühiti yaranıb. Məktəbin adı hər il birincilər sırasında çəkilir. Səmərəli fəaliyyətinə görə pedaqoji kollektivin üzvləri dəfələrlə tərifnamələr alıblar. T.Abbasova isə Laçın Rayon İcra Hakimiyyəti başçısının imzasıyla fəxri fərman verilib. Məktəbin  müvəffəqiyyəti ilbəil çoxalır, şagirdlər  rayon olimpiadalarında yüksək yerlər tuturlar. Ümummilli lider Heydər Əliyevin anadan olmasının ildönümü ilə bağlı keçirilən inşa yazı müsabiqələrində qalib olurlar. Məktəbin IX sinif şagirdi Ayşən Paşayeva ulu öndərin anadan olmasının 89-cu ildönümü münasibətilə keçirilən inşa müsabiqəsində yer tutub. XI sinif şagirdi Səbinə Məhərrəmli Mirzə Ələkbər Sabirin 150 illiyi ilə bağlı keçirilən inşa müsabiqəsində Təhsil Nazirliyinin fəxri fərmanına layiq görülüb. Xalq qəhrəmanı Sultan bəyin 140 illiyi münasibətilə keçirilən inşa müsabiqəsində X sinif şagirdi Orxan Sadıqov rayon icra hakimiyyətinin birinci dərəcəli diplomuna layiq görülüb. Heydər Əliyevin anadan olmasının 89-cu ildönümü ilə bağlı keçirilən rəsm, musiqi və digər sahələr üzrə müsabiqələrdə məktəbin şagirdləri Aysu Mansur qızı I dərəcəli, Minarə Abbaslı II dərəcəli, Ayşən Əlizadə III dərəcəli diploma layiq görülüb. 2010-2011-ci il tədris ilinin yekunlarına görə məktəbin XI sinfini bitirən 9 məzunundan 7 nəfəri ali məktəblərə daxil olub. Bu uğur rayon təhsil şöbəsi tərəfindən qiymətləndirilərək pedaqoji kollektiv üzvləri, o cümlədən məktəbin rəhbərliyi diplomlarla təltif olunub.

65 yaşlı Tapdıq müəllimin arzuları çoxdur. Onlardan ən ümdəsi isə Laçına qayıtmaqdır. "Doğma torpaq məni böyüdüb, ərsəyə çatdırıb, qol-qanad verib. İnanıram ki, tezliklə o torpaqlara qayıdacağıq. Çünki hazırda dövlətimiz tərəfindən beynəlxalq aləmdə aparılan uğurlu siyasət bunu deməyə əsas verir", - deyə Tapdıq müəllim bildirir.

Tapdıq müəllimin 5 övladı var, 3-ü qız, 2-si oğlan. Övladlarının hamısı ali təhsillidir. Oğlanlarının ikisi də iqtisadçıdır. Oğlanlardan biri Zahir Abbas 7 kitabın müəllifidir, Azərbaycan Yazıçılar Birliyinin üzvüdür, respublikada qələm sahibləri arasında tanınan simalardandır. Digər oğlu Mahir Abbasov ötən il dissertasiya müdafiə edərək, iqtisad elmləri üzrə fəlsəfə doktoru elmi dərəcəsini alıb. Qızları da müxtəlif ixtisaslar üzrə ali təhsillidir.

Qurub-yaratmaq, cəmiyyətə fayda vermək, elin-obanın, dostun işinə yaramaq hər zaman amalı olan 65 yaşlı Tapdıq müəllimi təbrik edir, ona möhkəm cansağlığı, fəaliyyətində daha böyük uğurlar, bir də tezliklə Güləbirdə qayıtmasını arzulayırıq.  

Yusif ƏLİYEV