İyulun 2-də Azərbaycan Müəllimlər İnstitutunda "Məzun-2012" adlı təntənəli tədbir keçirildi. Tədbirdə institutun rəhbərliyi, professor-müəllim heyəti və tələbələr, Azərbaycan Respublikası təhsil nazirinin müavini Qulu Novruzov, Nərimanov  Rayon İcra Hakimiyyətinin başçısının birinci müavini Şahmar İbadov, YAP Nərimanov rayon təşkilatının sədri Təhmiraz Tağıyev, YAP Gənclər Birliyinin nümayəndələri və digərləri iştirak etdilər.

Tədbirdən əvvəl AMİ-nin professor-müəllim heyəti, qonaqlar və tələbələr institutun Heydər Əliyev Mərkəzini ziyarət etdilər  və ulu öndərin büstü önünə əklil qoydular.

İnstitutun rektoru, millət vəkili, professor Aqiyə Naxçıvanlı tədbiri açaraq 2012-ci ildə Azərbaycan Müəllimlər İnstitutu və onun filiallarında, ümumilikdə, 1718 bakalavr və 17 magistr məzunun yola salındığını diqqətə çatdırdı. Rektor məzun adını qazanmış bütün tələbələri təbrik etdi və onlara uğurlar arzuladı. Ümummilli lider Heydər Əliyev ideyalarının, ulu öndərin gənclər siyasətinin indi daha da inkişaf etdiyini, cənab Prezident İlham Əliyev tərəfindən uğurla davam etdirildiyini bildirdi.

Dövlət himni səsləndirildi.

Təhsil nazirinin müavini Qulu Novruzov çıxış edərək məzunları təbrik etdi, çətin və şərəfli olan müəllim peşəsinə yiyələnmiş məzunların məhz gələcək nəslin tərbiyə edilməsində əsas rol oynayacaqlarını vurğuladı. Nazir müavini Azərbaycan Müəllimlər İnstitutunun son illərdəki fəaliyyətini və rektor Aqiyə Naxçıvanlının rəhbərliyi altında institutun əldə etdiyi böyük nailiyyətləri yüksək qiymətləndirdi. Q.Novruzov Azərbaycan gənclərinin ictimai-siyasi hadisələrdə iştirakının stimullaşdırılması üçün son illərdə ölkəmizdə xeyli işlər görüldüyünü, ölkə başçısı tərəfindən xüsusilə təhsil sahəsində bir sıra mütərəqqi sənədlərin qəbul olunduğunu bildirdi.

YAP Nərimanov rayon təşkilatının sədri Təhmiraz Tağıyev Azərbaycan Müəllimlər İnstitutunun bu gün müstəqil Azərbaycanda dövlət quruculuğunun möhkəmləndirilməsi, milli dövlətçilik ideologiyasının təbliği sahəsində uğurlu fəaliyyət göstərən ali təhsil müəssisələri sırasında mühüm yerlərdən birini tutduğunu bildirdi və məzunları gözəl bayram münasibətilə təbrik etdi.

Daha sonra təhsildə və institutun ictimai işlərində fəallığı ilə seçilmiş bir qrup məzuna fəxri fərman, bu il məzun olan magistrlərə diplomlar təqdim edildi.

Bir neçə qrupun məzunları musiqili təbrik nömrələrini təqdim etdilər. Məzunlar müasir standartlara cavab verən bu təhsil ocağında yüksək təhsil ala bildikləri üçün yaradılmış bütün şəraitə görə institutun rektoru Aqiyə Naxçıvanlıya dərin minnətdarlıqlarını bildirdilər. 

Tədbir böyük maraqla qarşılanmış konsert proqramı ilə başa çatdı.