İyunun 28-də Bakı Şəhəri üzrə Təhsil İdarəsinin təşkilatçılığı və "Bakcell"in dəstəyi ilə Bakıdakı Heydər Əliyev adına İdman-Konsert Kompleksində  paytaxt məktəblərinin 2011-2012-ci tədris ili məzunlarının  təntənəli buraxılış gecəsi keçirildi. Tədbirdə təhsil naziri Misir Mərdanov, Bakı Şəhəri üzrə Təhsil İdarəsinin müdiri Nailə Rzaquliyeva, dövlət qurumlarının nümayəndələri və builki məzunlar iştirak edirdilər.

Tədbiri giriş sözü ilə açan BŞTİ-nin müdiri Nailə Rzaquliyeva ümummilli lider Heydər Əliyevin ideyaları əsasında formalaşan təhsilimizin dünya təhsil sisteminə inteqrasiya olunduğunu nəzərə çatdırdı. Ulu öndərin  layiqli davamçısı ölkə Prezidenti cənab İlham Əliyevin rəhbərliyi altında həyata keçirilən təhsil islahatlarının əhəmiyyətindən söz açdı. N.Rzaquliyeva Heydər Əliyev Fondunun prezidenti Mehriban xanım Əliyevanın təhsilimizə göstərdiyi böyük diqqət və qayğıdan danışdı. Təhsilimizin sürətli inkişafından bəhs edən  N.Rzaquliyeva son illərdə paytaxt məzunlarının qazandığı uğurları, əldə etdikləri nailiyyətləri diqqətə çatdırdı. Qeyd etdi ki, builki buraxılış imtahanlarının nəticələrinə görə, Bakı məktəblərini bitirənlərdən 20-si qızıl medala layiq görülüb. Bildirdi ki, Bakı məktəbliləri hər il ali məktəblərə qəbul imtahanlarında yüksək nəticələr göstərirlər. Ötən tədris ilində məzunların 55 faizindən çoxu tələbə adını qazanıb. Qəbul imtahanlarında ən yüksək nəticə göstərən 4 abituriyent Bakı məktəblərinin məzunu olub. Sonra N.Rzaquliyeva Heydər Əliyev Fondunun prezidenti, YUNESKO-nun və İSESKO-nun xoşməramlı səfiri, Milli Məclisin deputatı Mehriban xanım Əliyevanın məzunlara təbrik məktubunu oxudu.

Tədbirdə çıxış edən təhsil naziri Misir Mərdanov ölkəmizdə təhsil sahəsinə göstərilən diqqət və qayğını xüsusi vurğuladı. Azərbaycan Respublikasının Prezidenti İlham Əliyevin təhsillə bağlı imzaladığı sənədlərin əhəmiyyətindən söz açdı. Misir Mərdanov cari tədris ilinin bütün məzunlarını təbrik edərək, onlara Vətənə,  xalqa ləyaqətli vətəndaş olmağı, müstəqil dövlətimizin daha da inkişafı naminə var gücləri ilə çalışmağı tövsiyə etdi. Azərbaycanın çiçəklənən bir dövründə təhsil aldıqlarını bildirən nazir məzunlara dövlətimizin həyata keçirdiyi bütün islahatlarda dəstək olmalarını arzuladı. Məzunlara gələcək həyatlarında uğurlar diləyən Misir Mərdanov onların bu səviyyəyə gəlib çatmasında əməyi olan müəllimləri və valideynləri də təbrik etdi.

Sonra  2011-2012-ci tədris ilində qızıl medala layiq görülən 20 məzuna hədiyyələr təqdim edildi.

Məzunlar üçün hazırlanmış əyləncəli proqramda yerli və xarici mügənnilərin ifasında bir-birindən gözəl mahnılar səsləndirildi.

Niyazi RƏHİMOV