|
Təhsil Nazirliyinin "Ümumtəhsil məktəblərində "Şahmat"
fənninin tədrisi barədə" 29 dekabr 2011-ci il tarixli,
2198 nömrəli əmrinə uyğun olaraq, 2012-ci ilin yanvar
ayından başlayaraq hər rayon və şəhərdən seçilmiş bir
ümumtəhsil məktəbinin 2-ci siniflərində "Şahmat"
fənninin tədrisinə başlanmışdır. Bununla əlaqədar
müvafiq tədris planı və proqram, həmçinin "Şahmat - 2"
adlı dərs vəsaiti hazırlanmış, fənni tədris edəcək
müəllimlər üçün təlim kursları keçirilmişdir.
Ötən müddət ərzində aparılan müşahidə və təhlillər
göstərmişdir ki, "Şahmat" fənninin tədrisi şagirdlərin
böyük marağına səbəb olmaqla onların idraki fəallığını
xeyli artırmış, düşünmə qabiliyyətlərini gücləndirmişdir.
Bütün bunların nəticəsində şagirdlərin digər fənlərdən
təlim göstəriciləri də nəzərəçarpacaq dərəcədə
yüksəlmişdir. Fənnin tədrisi sahəsində qazanılan uğurlar
şahmat təliminin növbəti siniflərdə də davam
etdirilməsinə və pilot məktəblər şəbəkəsinin
genişləndirilməsinə etibarlı zəmin yaradır.
Qeyd olunanları və şagirdlərin intellektual səviyyəsinin
yüksəlməsində "Şahmat" fənninin tədrisinin əhəmiyyətli
rolunu nəzərə alaraq
ƏMR EDİRƏM:
1. 2012-2013-cü dərs ilində "Şahmat" fənni tədris edilən
pilot ümumtəhsil məktəblərinin şəbəkəsinin
genişləndirilməsi məqsədəuyğun hesab olunsun.
2. 2012-2013-cü dərs ilində müəyyən olunmuş müvafiq
pilot ümumtəhsil məktəblərinin II siniflərində "Şahmat"
fənni tədris edilsin.
3. "Şahmat" fənninin tədrisinə 2012-ci ilin yanvar
ayından başlanmış pilot ümumtəhsil məktəblərində həmin
fənn III siniflərdə davam etdirilsin.
4. "Şahmat" fənni II və III siniflərdə dərsdənkənar
məşğələlərə ayrılmış vaxt hesabına dərs cədvəlinə daxil
edilməklə həftədə bir saat tədris olunsun.
5. II və III siniflər üzrə "Şahmat" fənninin tədris
planı və proqramı, pilot məktəblərin və həmin fənn üzrə
müəllimlərin siyahıları təsdiq edilsin (əlavə olunur).
6. Pilot məktəblərin fənn üzrə müvafiq avadanlıq və
ləvazimatlarla təminatı yerli təhsil orqanlarına həvalə
edilsin.
7. Strateji təhlil, planlaşdırma və kadrların
idarəolunması şöbəsi (F.Qədirov), Tərbiyə və
məktəbdənkənar müəssisələrlə iş şöbəsi (A.İbrahimov) "Şahmat"
fənnini tədris edəcək müəllimlər üçün cari ilin
avqust-sentyabr aylarında təlim kursu təşkil etsinlər.
8. Dərslik və nəşriyyat şöbəsi (F.Şahbazlı) təsdiq
olunmuş tədris proqramına uyğun hazırlanmış dərs
vəsaitinə qrif verilməsini təmin etsin.
9. İqtisadiyyat şöbəsi (Ş.Əliyev) müvafiq dərs
vəsaitinin hazırlanması, çapı və təlim kurslarının
təşkili ilə bağlı tədbirlərin maliyyələşdirilməsini
təmin etsin.
10. Kənd rayonları üzrə ümumi təhsil şöbəsi (A.Əhmədov),
Strateji təhlil, planlaşdırma və kadrların idarəolunması
şöbəsi (F.Qədirov), Tərbiyə və məktəbdənkənar
müəssisələrlə iş şöbəsi (A.İbrahimov) "Şahmat" fənninin
tədrisi ilə bağlı yerli təhsil orqanlarına köməklik
göstərsinlər, dərs ili ərzində seçmə yolla müəyyən
olunmuş pilot məktəblərində fənnin tədrisi vəziyyətini
öyrənib təkliflər hazırlasınlar.
11. İctimaiyyətlə əlaqə şöbəsi (B.Hüseynzadə) bu əmrin "Azərbaycan
müəllimi" qəzetində dərc olunmasını və əlavələrlə
birlikdə nazirliyin İnternet səhifəsində
yerləşdirilməsini təmin etsin.
12. Ümumi şöbə (X.Fərəcov) bu əmri əlavələrlə birlikdə
çoxaldıb yerlərə göndərsin.
13. Əmrin icrasına nəzarəti öz üzərimdə saxlayıram.
Misir MƏRDANOV,
Azərbaycan Respublikasının təhsil naziri
3 iyul 2012-ci il |
