Şamaxı Şahmat məktəbinin direktoru, əməkdar müəllim Asif Ağayevdən aldığımız məlumatda bildirilir ki, 24 may- 2 iyun tarixlərində Oğuz rayonunda 28 May- Respublika Gününə həsr olunmuş respublika şahmat turniri keçirilib.

Turnirdə 20-dən çox şəhər və rayon şahmatçıları mübarizə aparıb. Bakı və Sumqayıt şahmatçılarının çoxluq təşkil etdiyi yarışlar gərgin idman mübarizəsi şəraitində keçib. Bu yarışda yüzdən çox şahmatçı İsveçrə sistemi üzrə mübarizə aparıb. 5 yaş qrupu üzrə oğlanlar və qızlar arasında qaliblər müəyyənləşdirilib. 4 nəfər Şamaxı şahmatçısı turniri uğurla başa vurub. 10 yaşa qədər şahmatçılar arasında şəhər 9 nömrəli tam orta məktəbin III sinif şagirdi Mənsur Sərxanov 5,5 xalla II nəticə göstərib. Həmin məktəbin IV sinif şagirdi Asim Sərxanov 6 xalla 12 yaşa qədər şahmatçılar arasında III olub. Bu yaş qrupunda çıxış edən digər Şamaxı şahmatçısı-şəhər 1 nömrəli tam orta məktəbin V sinif şagirdi Cavanşir Məmmədov da 6 xal toplayaraq III-IV yerləri bölüşdürüb.

14 yaşa qədər şahmatçılar arasında çıxış edən şəhər 2 nömrəli tam orta məktəbin VII sinif şagirdi Niyaz Məmmədov da gərgin mübarizə nəticəsində III nəticə göstərib.

Ümumu turnirin qalibi adına isə Bakı şahmatçısı Aytən Əmrayeva layiq görülüb.

Turnirin qaliblərinə diplom və mükafatlar təqdim olunub. 

ƏDALƏT