İyunun 14-də Azərbaycan Dövlət Pedaqoji Universitetində 15 İyun - Milli Qurtuluş Gününə həsr olunmuş tədbir keçirilib. ADPU-nun rektoru, Azərbaycan Milli Elmlər Akademiyasının müxbir üzvü, professor  Yusif Məmmədov əlamətdar gün münasibətilə kollektivi təbrik edib və  tədbirin əhəmiyyətindən danışıb.

Bildirilib ki, 15 iyun  xalqımızın qurtuluş mübarizəsinin təntənəsi və qələbə çaldığı bir gündür. Bu tarixi gün, eyni zamanda Azərbaycan dövlətçiliyinin xilası günüdür. Həmin gün xalqımız ümummilli lider Heydər Əliyevin böyük müdrikliyi, qətiyyəti, siyasi uzaqgörənliyi, gərgin səyləri və fədakarlığı sayəsində vətəndaş müharibəsi təhlükəsindən xilas olmuş, sabitlik və tərəqqi yoluna çıxmış, ölkəmizdə əsl hüquqi, demokratik, dünyəvi dövlət quruculuğunun bünövrəsi qoyulmuşdur.

Sonra  ADPU-nun türk və Şərqi Avropa xalqları tarixi və tarixin tədrisi metodikası kafedrasının professoru Mais Əmrahov, tarix fakültəsinin magistrantı Təhminə Yarəliyeva və digər çıxış edənlər də ulu öndər Heydər Əliyevin tarixi xidmətlərindən danışıblar.

Şakir CƏFƏROV