BSU-nun məktəb-lisey kompleksində XX əsr Azərbaycan ədəbiyyatının görkəmli simalarından biri olan satirik şair M.Ə.Sabirin 150 illik yubileyi keçirilib. Şagirdlər ədəbi-bədii kompozisiya  hazırlamışdılar. "Çatlayır Xanbacı qəmdən ürəyim", "Kişi", "Uşaqdır uşağım" əsərləri şagirdlərin ifasında maraqla qarşılanıb. Şairin yaratdığı orijinal bədii vasitələr və surətlər, satirik dialoq və monoloqlar ustalıqla qələmə alındığı kimi ustalıqla da səhnələşdirilmişdi. Məktəblilər "Millət necə tarac olur olsun","Fəhlə, özünü sən də bir insanmı sanırsan?", "Bir cibimdə əskinazım, bir cibimdə ağ manat" deyən zülmkar mülkədarların iç üzünü obrazlı şəkildə nümayiş etdirə bildilər. V sinif şagirdlərinin Sabirin uşaq şeirləri və satiraları əsasında hazırladıqları kompozisiya şairin yaradıcılığının  nə qədər geniş və məzmunlu olduğunu bir daha sübut etdi. Tədbirdə xalq artisti, mərhum sənətkarımız Mirzə Babayevin ifasında M.Ə.Sabirin "Tək səbir",  "Oxutmuram, əl çəkin!" satiralarına bəstələnmiş mahnılarının lent yazıları da səsləndirildi.

Sifai SƏFƏROVA