30 ildən artıqdır ki, Ucar şəhər 2 nömrəli orta məktəbin dil-ədəbiyyat müəllimiyəm. Məktəb fənn metodbirləşməsinə rəhbərlik edirəm. İşlədiyim illərin çoxu sovet dövrünə təsadüf edib. Sovet maarif sisteminin çox güclü şaxələrə malik olması danılmazdır. Uzun illər sovet məktəblərində ənənəvi metod hegemonluq etmişdir. Ənənəvi metodda müəllim subyekt, şagird isə obyekt rolunda çıxış edirdi. Şagirdə müstəqillik verilmirdi. Şagird potensialının bir hissəsini üzə çıxarırdı. Uzun illər bağlı olduğumuz metodun artıq arxa plana keçdiyinin şahidi oluruq. Şagirdin öyrəndiyi bilikləri tətbiq edə bilməməsi ənənəvi metodun uğursuzluqlarındandır. Mənə elə gəlirdi ki, bu metod həmişə öndə gedəcək, flaqman rolu oynayacaqdır. Amma belə olmadı. Fəal interaktiv metod ənənəvi metodu üstələdi. Təhsil islahatının həyata keçirilməsi ilə əlaqədar olaraq ənənəvi metod sıxışdırılaraq öz yerini interaktiv metoda verdi. İnteraktiv metodda mərkəzdə, aparıcı mövqedə şagird durur. Müəllim istiqamət verən, bələdçi funksiyasını yerinə yetirir. 

İnteraktiv metodda müəllim bir qədər passiv, şagird isə aktiv rol oynayır. Bu təlim prosesində şagirdlər zəruri olan biliyi müstəqil kəşf edir və mənimsəyir. Problem situasiyanı müəllim yaradır, şagird isə tədqiqatçı kimi problemin həllinə çalışır. Hər iki təlim metodunun müqayisəsindən məlum olur ki, interaktiv metod hələlik kütləviləşməsə də, təhsilin tələbatını ödəyən, şagirdi fəallaşdıran, məntiqini inkişaf etdirən, tədqiqata cəlb edən metoddur. Bu metodu kütləviləşdirmək üçün güclü maarifləndirmə işləri aparmaq lazımdır. Bu məqsədlə müəllimləri kütləvi surətdə kurslara cəlb etmək, külli miqdarda metodiki vəsaitlər nəşr etdirmək və müəllimlər arasında yaymaq lazımdır. Yeni təlim metodlarına aid vəsaitlərin çoxluğu müəllimlərin marağına, öz üzərlərində daha çox çalışmasına, bu təlim metodlarına daha çox bağlanmasına səbəb olar. Yeni təlim metodlarının uğurla tətbiq olunması Azərbaycan təhsil sisteminin Avropa təhsil sisteminə inteqrasiyasını sürətləndirir, bizi bu təhsil sisteminə daha da yaxınlaşdırır və təhsilimizin  gələcəyinin daha işıqlı olacağına təminat yaradır. İnanıram ki, bu metod uğurla sınaqdan çıxacaq. 

Zahidə MƏMMƏDOVA,
Ucar şəhər 2 nömrəli orta
məktəbin dil-ədəbiyyat müəllimi