"SOS" Uşaq Kəndləri  Azərbaycan Assosiasiyası Bakıdakı 257 nömrəli tam orta məktəbdə konfrans keçirib. Konfransı təhsil ocağının direktoru Qarat Qaratov və assosiasiyanın təhsil üzrə milli məsləhətçisi Nərgiz Hacıyeva aparmışlar. Müzakirə və geniş  diskussiya şəraitində keçən tədbirdə inklüziv təhsil üzrə mütəxəssislər - Azərbaycana Birgə Yardım İctimai  Birliyinin təmsilçisi  Gülnarə  Pənahova  və "Dünyaya baxış" beynəlxalq təşkilatının nümayəndəsi Murad Məmmədov çıxış  edərək Azərbaycanda inklüziv təhsilin vəziyyəti barədə ətraflı məlumat veriblər. Eyni zamanda  bu sahənin inkişafında maarifləndirmə işinin mühüm əhəmiyyət kəsb etdiyini vurğulayıblar. Müasir Təhsil və  Tədrisə Yardım Mərkəzinin inklüziv təhsil üzrə mütəxəssisi Lamiyə Şərəfxanova "İnklüziv cəmiyyət: təhsildə sosial inklüziya və sosial ədalət" mövzusunda  çıxış etdi. Sonra pedaqoji kollektiv və valideynləri maraqlandıran suallar mütəxəssislər tərəfindən cavablandırıldı.

Qeyd edək ki, 1999-cu ildən ölkəmizdə fəaliyyət göstərən  "SOS" Uşaq Kəndləri Azərbaycan Assosiasiyasının  məqsəd və məramı ailə qayğısından məhrum olan uşaqlar üçün ailə modelini, ailə mühitini yaratmaq olub. Təşkilat  2011-ci ildən məktəbdə "Təhsilə dəstək" layihəsinin icrasına başlayıb. Məktəbdə təhsil alan uşaqların  rifahının yüksəlməsi məqsədilə təhsil ocağının 2 sinif otağı "Təhsilə dəstək" layihəsi çərçivəsində əsaslı təmir olunaraq bütün texniki avadanlıqlarla təchiz edilməklə 150 uşağın istifadəsinə verilib. Layihə çərçivəsində Azərbaycan dili, ingilis dili, riyaziyyat və informatika dərsləri məktəbin müəllimləri tərəfindən aparılır. Qeyri-hökumət təşkilatlarında fəaliyyət göstərən mütəxəssislər mütəmadi olaraq müəllimlərə həyat bacarıqları haqqında təlimlər keçir, psixoloji konsultasiyalar verirlər. Onlarla "İnteraktiv təlim metodologiyası", "Uşaqların mühafizəsi","Risk qrupunda olan uşaqlarla işdə psixoloji aspektlər" və "Sosial inklüziya" adlı bacarıqların artırılması və gücləndirilməsi təlimləri keçirilir. 

Sifai SƏFƏROVA