Respublikamızda təhsil islahatlarının geniş vüsət aldığı bir zamanda təhsil işçiləri davamlı şəkildə öz peşəkarlıqlarını yüksəltmək zərurəti qarşısında qalırlar. Bunun üçün də Təhsil  Nazirliyi  tərəfindən davamlı olaraq təkmilləşdirmə kursları təşkil olunur. Hazırda respublikamızın əksər bölgələrində Təhsil Nazirliyinin  xətti ilə bir çox  layihələr həyata  keçirilir. Bu layihələrdən biri də "Müəllimlərin peşəkarlıq səviyyəsinin təkmilləşdirilməsi" treninqlərinin davamlı olaraq keçirilməsidir.

Həmin treninqlər 40-a yaxın bölgəni əhatə edir. Treninqlərin icraçısı "Mədəd-Azərbaycan"    Məhdud Məsuliyyətli Cəmiyyətidir. Treninqlərin aparıcıları təşkilat tərəfindən bölgələr üzrə  seçilmiş təlimçilərdir.

Mən "Mədəd-Azərbaycan" təşkilatının təlimçisi kimi İmişli rayonunda builki layihəyə əsasən  550 nəfər müəllimi əhatə edən təlimləri aparıram. 2012-2013-cü tədris  ilində daha 550 nəfərin  layihəyə qoşulması nəzərdə tutulub. Yeri  gəlmişkən qeyd edim ki, analoji təlimləri bundan əvvəl  Sabirabad və Saatlı rayonlarında  da aparmışam. Onu deyə bilərəm ki, bu təlimlərin müəllimlərə göstərdiyi müsbət təsir, sözün əsl mənasında, çox  güclüdür. Onlar bu təlimlərin davamlı olmasını istəyirlər. Təsəvvür edin ki, vaxtilə ali  məktəbi bitirmiş müəllimlər uzun illər  təhsil sahəsində olan yeniliklərlə  televiziya və ya mətbuat  vasitəsi ilə məlumatlanırdılarsa, artıq  treninqlərə qatılan iştirakçılar 48  saatlıq bir paketlə  bu işin sürətli  və səmərəli nəticəsini görürlər. Burada  məqsəd müəllimləri şəxsiyyətyönümlü təhsil və interaktiv təlim metodları, informasiya texnologiyalarından səmərəli istifadə ilə tanış etməkdir. Müəllimlər  birlikdə işləmək, ünsiyyət qurmaq, əməkdaşlıq  etmək bacarıqlarının inkişaf etdirilməsinin zəruri olduğunu bu təlimlərdə başa  düşürlər.

İmişli bölgəsində 550 nəfəri əhatə  edən təlimlərin birinci mərhələsi artıq yekunlaşıb. Layihənin davamı 2012-ci ilin sentyabr ayından nəzərdə tutulmuşdur. Bir təlimçi  kimi bölgə müəllimlərinin və bütövlükdə təhsil ictimaiyyətinin layihənin reallaşmasına münasibətini qənaətbəxş hesab edirəm.

Biz pedaqoji işçilərin təlim prosesində qarşımıza qoyulan əsas vəzifə  xalqın azadlıq amalına, demokratiya prinsiplərinə uyğun milli mənəvi, ümumbəşəri dəyərləri mənimsəyən, onları qoruyan və inkişaf etdirən, geniş dünyagörüşünə malik və yenilikləri qiymətləndirməyi bacaran şəxsiyyət formalaşdırmaqdır.

Bu taleyüklü  məsələdə əməyi olan hər kəsə "Mədəd-Azərbaycan" MMC adından minnətdarlıq edir və bu işdə daha yaxından və daha yaradıcılıqla iştirak etməsini arzulayırıq.  

Sevinc MƏHƏRRƏMOVA,
"Mədəd-Azərbaycan" MMC-nin  təlimçisi