Moldova Respublikasının sabiq prezidenti Petru Luçinski Bakı Dövlət Universitetində tələbələrlə görüşüb. Görüşdə çıxış edən BDU-nun rektoru, akademik Abel Məhərrəmov ali qonağı Azərbaycanın ilk ali təhsil ocağında salamlayaraq universitetin tarixi, son nailiyyətləri haqqında məlumat verib. Azərbaycan-Moldova əlaqələrindən danışan rektor ümummilli lider Heydər Əliyevin iki ölkə arasındakı münasibətlərin inkişafında və möhkəmləndirilməsində Petru Luçinskinin rolunu yüksək qiymətləndirdiyini bildirib.

Tələbələr qarşısında çıxış edən Petru Luçinski Sovet İttifaqının dağılması, bu proseslərdə Azərbaycan və Moldovanın yeri, müstəqilliyini əldə edən bu iki ölkədəki mövcud vəziyyət mövzusunda məruzə edib. Natiq qeyd edib ki, Azərbaycanın bugünkü uğurlarını illərlə aparılan ardıcıl və məqsədyönlü siyasətdə görür. Azərbaycan-Moldova arasındakı dostluq əlaqələrinin tarixindən danışan sabiq prezident ümummilli lider Heydər Əliyev ilə  çox isti münasibətlərinin olduğunu qeyd edib. 

1997-ci ildən Bakı Dövlət Universitetinin fəxri doktoru olan Petru Luçinski tələbələrin çoxsaylı suallarına cavab verib.  Görüşdə Moldovanın Azərbaycandakı səfiri İqor Bodiu və Moldova Azərbaycanlıları Konqresinin prezidenti Vüqar Novruzov iştirak ediblər.    

BDU-nun Mətbuat və informasiya şöbəsi