Mayın 31-də ölkəmizin bütün ümumtəhsil məktəblərində  2011-2012-ci tədris ilinin başa  çatdığını bildirən son zəng çalındı. Bu münasibətlə tədris ocaqlarında məzunların həmişə xoş xatirə kimi anacaqları ənənəvi "Son zəng" tədbirləri keçirildi. Doğma, əziz müəllimləri müstəqil həyata qədəm qoyan məzunlara son məsləhət və tövsiyələrini verdilər, gələcək fəaliyyətlərində, təhsillərində onlara uğurlar arzuladılar. On minlərlə X sinif şagirdi onlardan estafeti qəbul etdi. İllərlə yaranmış gözəl ənənəyə uyğun olaraq I sinfi bitirən şagirdlər məzunlara gül dəstələri təqdim edib onlardan hədiyyələr aldılar.

Təhsil Nazirliyindən verilən məlumata görə, 2011-2012-ci tədris ilində ölkəmizin ümumi təhsil məktəblərinin buraxılış (XI, XII) siniflərini 92178 şagird bitirəcək. Müqayisə üçün qeyd edək ki, bu göstərici ötən il 97653 nəfər təşkil edib.

Qiyabi və axşam ümumi təhsil məktəblərinin XII sinfini başa vuran şagirdlərin sayı 2011-ci ildə 442 nəfər olduğu halda, bu il 786 nəfər olacaq.

2011-2012-ci tədris ilində Bakı şəhərindəki əyani ümumi təhsil məktəblərinin XI sinfini 24285, IX sinfini isə 33977 şagirdin bitirəcəyi gözlənilir.

2011-2012-ci dərs ilində ölkə üzrə I sinif şagirdlərinin sayı 125807 nəfər olub. Bu göstərici 2010-2011-ci tədris ilində 120420 nəfər təşkil edib. 2012-2013-cü tədris ilində isə ümumi təhsil məktəblərinin I sinfinə 130454 şagirdin qəbul olunacağı proqnozlaşdırılır.

Son zəng həm də ali məktəblərdə tədris ilinin sona çatdığını xəbər verir.

Hazırda Təhsil Nazirliyinin tabeliyində olan ali təhsil müəssisələrində 99924 tələbə təhsil alır. Onlardan 91652 nəfərini bakalavr, 8272 nəfərini isə magistrantlar təşkil edir.

Təhsil Nazirliyinin tabeliyindəki ali məktəblərin son kurslarında 24795 nəfər tələbə təhsil alır ki, onların da 21779 nəfəri bakalavr, 3016 nəfəri isə magistrantdır.

Özəl ali təhsil müəssisələrində bakalavriatura səviyyəsi üzrə 18689, magistratura səviyyəsində isə 926 nəfər olmaqla, cəmi 19615 tələbə təhsil alır.

Ümumtəhsil məktəblərinin və ali təhsil müəssisələrinin məzunlarını qarşıda son sınaq -buraxılış imtahanları gözləyir. Bütün məzunları təbrik edir, onlara bitirdikləri təhsil ocaqlarında son sınaqdan da şərəflə çıxmalarını arzulayır, müstəqil həyatlarında uğurlar diləyirik. 

Yusif ƏLİYEV