Dərs ili sona çatır. Bu münasibətlə təhsil ocaqlarında bir-birindən maraqlı tədbirlər həyata keçirilir. Belə tədbirlərdən biri də mayın 21-də Bakıdakı 8 nömrəli tam orta məktəbdə təşkil olunmuşdu. Həmin gün məktəbin rus bölməsi üzrə I "B" sinfinin şagirdləri ilk dərs illərini başa vurmalarını bayram şənliyi ilə qeyd edirdilər. Uşaqların sevincini bölüşməyə valideynləri də gəlmişdilər.

Tədbirin keçirildiyi akt zalı nağıllar aləmini xatırladırdı. Şənliyin ssenarisi də buna uyğun, yəni rus və Azərbaycan uşaq nağıllarının süjetləri əsasında hazırlanmışdı.

Azərbaycanın Dövlət himninin ifasından sonra uşaq nağıllarının personajlarına uyğun geyimlərdə iki-bir, üç-bir səhnəyə çıxan birincilər şeirlər söylədilər, mahnılar oxudular, rəqs etdilər. Sevimli nağıl qəhrəmanlarının obrazlarını məharətlə canlandıran Məryam, Ofeliya, Ramil, Ayxan, Anar, Tamam, Fidan, Zarina, Nail, İnam, Aslan, Hüseyn, Arif, Fuad, Azad,  Fəxri, Xədicə, Orxan və başqalarının təqdim etdikləri səhnələşdirilmiş tamaşalar şənlik iştirakçıları tərəfindən alqışlarla qarşılandı.

Sinələrindən "Azərbaycan" sözünün hərfləri yazılmış lövhələr asan şagirdlərin çıxışları da tədbirdə yaşanan bayram ovqatını xeyli artırdı, müəllimlərində və valideynlərində qürur hissi doğurdu. Şagirdlər anaya, Vətənə, Azərbaycana həsr olunmuş şeirlər söyləyib, mahnılar oxudular. Tədbir onların səhnədə dövrə vurub "Yallı" getməsi ilə başa çatdı.

Bayram şənliyində birincilərin sinif müəllimi, 2009-2010-cu tədris ili üzrə "Ən yaxşı müəllim" müsabiqəsinin qalibi Jalə Zeynalova çıxış edərək birinci sinfi başa vurmaları münasibəti ilə yetirmələrini təbrik etdi, onların valideynlərinə gözaydınlığı verdi. Uşaqların bir il ərzində məktəbdə çox şey öyrəndiklərini qeyd edən J.Zeynalova onlara gələcək həyatlarında, təhsillərində uğurlar arzuladı, doğma vətənimiz Azərbaycanın layiqli oğul və qızları kimi böyümələrini tövsiyə etdi. Sonra o, I sinfi bitirmələri münasibəti ilə çəkdirdikləri xatirə şəkillərini şagirdlərə payladı.

Tədbirdə söz alan 8 nömrəli tam orta məktəbin direktoru Aytən Baxşıyeva da birincilərə, onların valideynlərinə  öz təbriklərini, xoş arzularını çatdırdı. O, şagirdlərin çıxışlarını, ümumilikdə bayram tədbirinin yüksək səviyyədə keçirildiyini xüsusi qeyd edib, bu işdə böyük zəhməti olmuş sinif müəllimi Jalə Zeynalovaya minnətdarlığını bildirdi.

Sonda birincilər öz müəllimlərinə gül dəstəsi təqdim edib onunla xatirə şəkilləri çəkdirdilər. 

Yusif ƏLİYEV