Bakıda məskunlaşmış Şuşa rayonunun Malıbəyli kənd 1 nömrəli tam orta məktəbinin 1 "a" sinif şagirdləri "Əlifba" bayramı keçiriblər.  

Bu çal-çağırlı tədbirdə məktəbin müəllimləri, birincilərin valideynləri, Şuşa Rayon Təhsil Şöbəsinin əməkdaşı iştirak edib.

Bayram tədbiri Dövlət himninin xoş sədaları ilə başlayıb.

Məktəbin direktoru Günəş Hüseynova, rayon təhsil şöbəsinin əməkdaşı Zülfiyyə Həsənova  1"a" sinfinin şagirdlərini bu sevimli bayramları münasibəti ilə təbrik edib, onlara gələcək təhsillərində uğurlar diləyiblər.

Bu tədbir həm də 1 "a" sinif şagirdlərinin sevimli müəllimləri Naciyə Kərimovanın hesabatı idi. O, birincilərin bir dərs gününün videoçarxını iştirakçılar üçün nümayiş etdirib.

Sonra şagirdlər müxtəlif bədii kompozisiya, səhnəcik, mahnı və rəqslərlə öz məharətlərini nümayiş etdiriblər. Eyni zamanda  birincilərin ifasında ana dilimizlə yanaşı ingilis dilində də doğma Azərbaycanı, əziz müəllimlərini tərənnüm edən şeirlər  səslənib.  Həmin gün A.Şaiq adına Azərbaycan Dövlət Kukla Teatrının aktyorları da  birinciləri təbrik etməyə gəliblər. Onlar uşaqların ən sevimli nağıllarından biri olan "Cik-cik xanımın nağılı" tamaşasını nümayiş etdiriblər.

Tədbirin sonunda 1 "a" sinfinin şagirdlərinin hər birinə "Mənim ilk müəllimim" adlı şəkil albomu təqdim edilib. 

Mənsurə MƏMMƏDOVA,
Şuşa rayon Malıbəyli kənd 1 nömrəli tam orta məktəbin təşkilatçısı