Qəzənfər  Hüseynov   riyaziyyat fənninin sirlərinə kiçik yaşlarından yiyələnməyə  həvəs göstərib. O,1997-ci ildə Bakıda anadan olub. Birinci sinfə Bakının Qaradağ rayonundakı 288 nömrəli tam orta məktəbə gedib. Dərs əlaçısı olub. Riyaziyyat fənninə maraq da onda məhz ibtidai sinifdə oxuyarkən yaranıb. Hətta  3-cü sinifdə  oxuyarkən riyaziyyat fənni üzrə  rayon miqyasında keçirilən məktəblərarası bilik yarışmasında diploma sahib olub. İbtidai təhsilini bu məktəbdə başa vuran  Qəzənfər təhsilini paytaxtdakı 249 nömrəli tam orta məktəbdə davam etdirib.

Burada da o, dərs əlaçısı olmaqla yanaşı, riyaziyyat fənni üzrə keçirilən bilik yarışmalarında fəallıq göstərərək birincilik qazanıb. Riyaziyyat fənninə olan həvəs onu paytaxtda fəaliyyət göstərən fizika-riyaziyyat və informatika təmayüllü liseyə gətirib. Hazırda o, gələcəyin çoxlu sayda  riyaziyyatçılarını yetişdirən liseydə IX sinifdə təhsil alır. Qısa müddətdə burada da  Qəzənfərin istedad və bacarığı müəllimlərinin  diqqətini cəlb edib. Çalışqanlığı ilə seçilən  Qəzənfər riyaziyyat üzrə keçirilən olimpiadanın məktəb, rayon, şəhər və respublika turunda iştirak edərək  birinci yerin sahibi olub. Bizimlə söhbətində riyaziyyat müəllimi  Mehralı Qarayev öz yetirməsinin gələcəkdə böyük riyaziyyatçı olacağına əminliyini bildirdi.   

S.SƏFƏROVA