Ulu öndər, ümummilli lider Heydər Əliyevin doğum gününü qeyd etdiyimiz bir ayda daha bir təhsil ilinə yekun vurmağa hazırlaşırıq. Biz müəllimlər cəmiyyətimizə, ölkəmizə dəyərli vətəndaşlar hazırlayırıq ki, Azərbaycanın beynəlxalq aləmdə nüfuzunun getdikcə yüksəlməsinə, uğurlarının artmasına nail olaq. "Təhsil millətin gələcəyidir!" - deyən ulu öndərimiz Heydər Əliyev daim ölkə təhsilinə xüsusi diqqət ayırmışdır. Ümummilli liderimizin layiqli davamçısı, ölkə başçımız İlham Əliyev və onun xanımı Mehriban Əliyeva bu gün  Azərbaycan təhsilinə xüsusi diqqət və qayğı ilə yanaşırlar. Ölkəmizdə təhsil daim təkmilləşdirilir.

Hər bir təhsil ocağının müəyyən uğurlar qazanmasında həmin müəssisəni idarə edən rəhbərliyin rolu böyük olur. Bakının Yasamal rayonunda yerləşən 21 nömrəli tam orta məktəb məhz belə təhsil ocaqlarındadır. Tarixçi-araşdırmaçı, "Babək və Hürrəmilik", "Hanı dediyim bəy ərənlər", "Dastan ədəbiyyatımıza kənar təsirlər", "Dörd anonim mənbə" və s. kitabların müəllifi, müxtəlif təhsil ocaqlarımızda həm pedaqoq, həm də rəhbər kadr kimi müəyyən uğurlara imza atan Ceyhun Bayramlı 2011-ci ilin oktyabr ayından bu məktəbə direktor təyin edilmişdir. Həmin vaxtdan 21 nömrəli tam orta məktəbin təhsil həyatında böyük canlanma baş verib. Dərs dinləmələr, yeni metodlarla keçilən "açıq dərs"lər daim müəllimləri təkmilləşdirməyə həvəsləndirib. Ceyhun müəllimin rəhbərliyi altında məktəbdə silsilə tədbirlər keçirilir və bu aktiv təhsil həyatı pedaqoji heyətin, şagird kollektivinin və valideynlərin böyük marağına səbəb olur.

Məktəbdə cari tədris ilində keçirilmiş maraqlı tədbirlərdən biri - aprelin 4-də keçirilən bilik yarışı haqqında xüsusilə danışmaq istərdim. Keyfiyyətli bilik nümayiş etdirən şagirdlərimiz Ceyhun müəllim tərəfindən dəyərli hədiyyələrlə mükafatlandırıldılar. Bu tədbirdə 8, 9 və 10-cu siniflər arasında öz humanitar biliklərini nümayiş etdirən şagirdlər bir daha əmin oldular ki, təhsil proqramları ilə yanaşı, dünyagörüşünü təkmilləşdirməklə keyfiyyətli bilik qazanmaq mümkündür. Məktəbimizin direktoru Ceyhun Bayramlı öz çıxışında yarışmanın devizini "Bilik qalib gəlsin!" kimi elan etdi.

Uğurlu tədbirlərimizdən daha biri ingilis dili fənni üzrə metodbirləşmənin "Öyrənək və öyrədək" başlığı altında keçirilən iclası oldu. Şagirdlərimizə keyfiyyətli bilik aşılamağın yolları ilə bağlı təcrübə mübadiləsi aparmaq üçün müəllimlərimiz "dəyirmi masa" arxasında toplaşdı. Direktor Ceyhun Bayramlının rəhbərliyi altında keçirilən bu toplantı treninq funksiyasını daşıdı. Belə ki, məktəbin direktoru "İngiliscəni necə öyrənməli və öyrətməli" başlığı altında məruzə xarakterli çıxış etdi. Çıxışda ingilis dilinin öyrənilməsi prosesində şagirdin əsasən müqayisəli-dilçilik metoduna üstünlük verməsinin  daha məqsədəuyğunluğu vurğulandı. Slayd vasitəsilə nümayiş etdirilən metodiki material ətrafında çıxışdan sonra faydalı fikir mübadiləsi aparıldı. Qeyd olundu ki, ölkəmizin Qərbə doğru inteqrasiyası ingilis dilinin əhatəli mənimsənilməsinə səbəb olur. Təhsil ocaqlarında da bu missiyanı ingilis dilindən şifahi nitqi, bu dildə mövcud olan dialektlərin fərqlərini aşkarlamaq, öyrənməklə inkişaf etdirmək tövsiyə olundu. Belə öyrədici treninqlərin gələcəkdə də davam etdirilməsi metodbirləşmə üzvləri tərəfindən irəli sürüldü.

Nəhayət, daha bir möhtəşəm tədbiri böyük ruh yüksəkliyi ilə başa vurduq. Hər il ölkəmizdə ulu öndərimiz  Heydər Əliyevin doğum günü münasibətilə Gül bayramı keçirilir. Yasamal rayonunda mayın 2-də keçirilən bu möhtəşəm bayrama bizim kollektiv də böyük ruh yüksəkliyi ilə hazırlaşmışdı. Rəhbərliyin təşəbbüsü ilə bu bayramla əlaqədar tədbirlər planı hazırlandı. Milli ornamentlər əsasında canlı güllərdən ibarət stendlər hazırlandı. Şagirdlərin muncuqlarla işlədiyi əl işləri və s. maketlər sərgidə tamaşaçılar tərəfindən böyük marağa səbəb oldu.

Prezident İlham Əliyevin diqqət və qayğısı nəticəsində ölkəmizdə hər il məktəblər təmir olunaraq müasir tədris ocaqlarına çevrilir. Hazırda məktəbimizin ərazisində də geniş miqyaslı təmir-tikinti işləri gedir. Ümid edirik ki, məktəbin yeni rəhbərliyinin başçılığı ilə pedaqoji kollektivimiz yeni dərs ilinə yeni təhsil kompleksində qədəm qoyacaqdır. Həyatını təhsil sistemimizə sərf  edən şərəfli, sədaqətli, fədakar Azərbaycan müəllimlərinə 21 nömrəli tam orta məktəbin kollektivi adından uğurlar diləyirik.

 Gülnarə SÜLEYMANOVA,
21 nömrəli tam orta məktəbin  ingilis dili müəllimi