Mayın 21-də Azərbaycan Dövlət Pedaqoji Universiteti Müasir Təhsil və Tədrisə Yardım Mərkəzi ilə birlikdə müəllim hazırlığı kursları vasitəsilə inklüziv təhsil komponentinin davamlılığının təmin  edilməsi  layihəsinin yekunlarına həsr olunmuş "Müəllim hazırlığında inklüziv təhsilin problemləri və perspektivləri" mövzusunda konfrans keçirdi.Tədbirdə Təhsil Nazirliyinin, MTTYM-in, Böyük Britaniyanın Aberdeen Universitetinin nümayəndələri və digər qonaqlar iştirak edirdilər.

Tədbiri giriş sözü ilə  ADPU-nun prorektoru, professor Malik Cəbrayılov  açaraq qonaqları təqdim etdi və konfrans haqqında qısa məlumat verdi.

ADPU-nun pedaqogika və psixologiya fakültəsinin dekanı, dosent Şəhla Əliyeva layihə ilə bağlı məruzə  etdi. Bildirdi ki, layihənin əsas məqsədi ADPU-nun  bakalavr pilləsi üçün hazırlanan kurs vasitəsilə milli məktəbəqədər təhsil sistemində inklüziv təhsil komponentinin inkişaf etdirilməsi və təcrübədə sınaqdan keçirilməsindən ibarətdir.

Azərbaycan dövləti tərəfindən müəllim hazırlığı və müəllimlərin davamlı inkişafı siyasəti istiqamətində aparılan islahatlara dəstək olaraq Müasir Təhsil və Tədrisə Yardım Mərkəzi Azərbaycan Respublikası Təhsil Nazirliyi və ADPU ilə birlikdə 2010-2012-ci  tədris illərində "Azərbaycanda xüsusi qayğıya ehtiyacı olan uşaqlar: müəllim hazırlığı sistemində inklüziv təhsilin inkişafı" adlı sınaq  layihəsini həyata keçirmişdir. Bu  layihə çərçivəsində mühazirə və  seminar məşğələləri pedaqogika və psixologiya fakültəsinin məktəbəqədər təlim və tərbiyə, korreksiyaedici təlim, təhsildə sosial-psixoloji xidmət ixtisasları üzrə  təhsil  alan tələbələrə keçirilmişdir.

MTTYM və ADPU arasında imzalanan razılaşma memorandumuna əsasən "Müəllim hazırlığı sistemi üçün inklüziv təhsil" kursunun hazırlanması məqsədi ilə işçi qrupu yaradılmışdır. İşçi qrupuna daxil olan mütəxəssislər əsasən ADPU-nun pedaqogika və psixologiya fakültəsinin müvafiq ixtisasları üzrə dərs deyən müəllimlər və MTTYM-in beynəlxalq dərəcəli mütəxəssislərindən  ibarətdir.

Şəhla Əliyeva  layihə  çərçivəsində  həyata keçirilmiş  işləri də  tədbir iştirakçılarının nəzərinə çatdırdı.

Tədbirdə Təhsil Nazirliyinin  nümayəndəsi Şərafət Şirinli, Müasir Təhsil  və Tədrisə  Yardım Mərkəzinin icraçı direktoru Ülviyyə Mikayılova, Böyük Britaniyanın Aberdeen Universitetinin professoru, layihənin beynəlxalq  eksperti Jane Mott və başqaları da  çıxış etdilər. 

Şakir CƏFƏROV