Dünya yaranandan nəsillərin tərbiyəsi kimi vacib və şərəfli missiya yerinə yetirən müəllimlər, onların dəyərli əməyi haqqında çox sözlər deyilib. Amma müəllimə ən böyük qiyməti bu günlər anadan olmasının 89-cu ildönümünü böyük sayğı və ehtiramla qeyd etdiyimiz müasir Azərbaycan dövlətinin yaradıcısı, ümummilli lider Heydər Əliyev verib. Bu böyük şəxsiyyət həyatını müəllimliyə həsr edən insanları həqiqətən fədakar, xalqına, millətinə sədaqətli və eyni zamanda qəhrəmanlıq göstərən insanlar kimi dəyərləndirib.

O, müəllimlərin ölkə, dövlət, cəmiyyət qarşısındakı böyük məsuliyyətini çox yaxşı bildiyi üçün özünün zəngin dövlətçilik, liderlik təcrübəsindən çıxış edərək biz müəllimlərə gənc nəslin tərbiyəsi işində hər zaman mayak olan dəyərli tövsiyələr vermiş, yollar göstərmişdir. Həmin tövsiyə və göstərişlər bu gün gənc nəslin tərbiyəsi işində böyük aktuallıq kəsb edir və yerinə yetirilməsi hər bir müəllim üçün şərəf işidir.

Ulu öndərin biz müəllimlərə ünvanlanmış tövsiyələrindən biri uşaqların vətənpərvərlik ruhunda tərbiyəsi ilə bağlıdır. Ümummilli liderimiz biz tərbiyəçilərin qarşısında bir vəzifə olaraq qoyurdu ki, uşaqlarımız məktəbəqədər yaş dövründən başlayaraq bəşəri dəyərlərdən istifadə edərək milli zəmin üzərində, milli adət-ənənələr ruhunda tərbiyə olunmalıdır.

Hər bir müəllim və tərbiyəçiyə çox yaxşı məlumdur ki, vətənpərvərlik tərbiyəsinin ən təsirli vasitələrindən biri böyüməkdə olan nəsillərin ölkənin tarixi, milli mədəniyyəti, adət-ənənələri, qəhrəmanlıq salnaməsi ilə yaxından tanış edilməsidir. Xalqımızın qədimliyini, mədəniyyətini, dünya miqyasında böyük şöhrətə malik olduğunu uşaqlara nə qədər dərindən çatdıra bilsək, bir o qədər onlarda vətənpərvərlik hissini yüksəltmiş olarıq.

Vətənpərvərlik tərbiyəsinin digər bir təsirli vasitəsi də xalqımızın dahi şəxsiyyətlərinin həyat və fəaliyyəti ilə məktəblilərin, bağça uşaqlarının tanış edilməsidir. Bu baxımdan ulu öndərimiz Heydər Əliyevin həyat yolu, çoxcəhətli fəaliyyəti, xalqının azadlığı yolunda göstərdiyi qəhrəmanlıqlar, dövlətçiliyimizin möhkəmləndirilməsindəki misilsiz xidmətləri, hər bir insanın həsəd apara biləcəyi yüksək insani keyfiyyətləri böyük tərbiyə məktəbidir.

Rəhbəri olduğum Bakının Xətai rayonundakı 240 nömrəli körpələr evi-uşaq bağçasında uşaqların vətənpərvərlik tərbiyəsində qeyd olunan hər iki  vasitədən geniş istifadə edirəm. İlk növbədə, uşaqlara vətənimizi dərindən tanıtdırmaq istiqamətində bütün məşğələlərdə məqsədyönlü işlər aparılır, tədbirlər keçirilir. Bu yollarla uşaqlara çatdırırıq ki, Azərbaycan qədim tarixə, yüksək mədəniyyətə malik ölkədir. Xalqımızın tarixində neçə-neçə görkəmli şəxsiyyətlər olub. Uzaq keçmişimizdən adları bizə gəlib çatmış Dədə Qorqud, Cavanşır, Babək, Nizami, Nəsimi, Füzuli, Koroğlu və b. kimi müdriklərimiz, sərkərdələrimiz, sənətkarlarımızla  haqlı olaraq fəxr edirik və etməliyik. Lakin yaradan 20-ci əsrdə xalqımıza elə böyük bir şəxsiyyət bəxş edib ki, onun tariximizdə tayı-bərabəri yoxdur. Bu, müasir dünyanın ən böyük siyasi və dövlət xadimlərindən biri, ötən əsrin son qərinəsindən başlayaraq 30 ildən çox bir dövr ərzində ölkəmizi, xalqımızı tərəqqi yolu ilə apararaq sürətli inkişafa çatdırmış, müstəqil Azərbaycanımızın memarı və yaradıcısı Heydər Əliyevdir.

Bağçamızda uşaqların ulu öndərin şəxsiyyəti nümunəsində tərbiyəsi, onun zəngin irsinin balacalara çatdırılması üçün olduqca müxtəlif yollardan istifadə olunur. Ulu öndərin anadan olmasının 89-cu ildönümü ilə əlaqədar bağçada silsilə tədbirlər hazırlayıb və həyata keçirmişik. Hər bir tərbiyəçi öz qrup uşaqlarının yaş xüsusiyyətlərini nəzərə alaraq gündəlik iş planlarında Heydər Əliyevin həyat və fəaliyyəti haqqında mövzular müəyyənləşdiriblər. Bu mövzulara uyğun olaraq həm məşğələlərdə, həm də məşğələlərdənkənar fəaliyyət zamanı ulu öndər haqqında uşaqlara geniş məlumat verirlər.

"Ümid çırağımız", "Heydər baba", "Uşaqların sevimlisi" və s. mövzularda keçirilən məşğələlər uşaqlarda ulu öndərə məhəbbət və hörmət hissi yaradır, onları böyük siyasətçinin fəaliyyəti, uğrunda mübarizə apardığı ideallarla yaxından tanış edir.

Uşaqları müntəzəm olaraq rayonumuzun ərazisindəki "Heydər bağı"na aparır, dahi rəhbər haqqında onlarla söhbətlər edirik. Bu böyük şəxsiyyət onların körpə qəlblərində həmişəlik yaşayacaq. Çünki onlara bu xoşbəxt həyatı bəxş edən o böyük insandır.

Kiçikyaşlı uşaqların vətənpərvərlik tərbiyəsində dövlət rəmzlərinin də mühüm rolu vardır. Ulu öndər dövlət atributlarımız haqqında çox qiymətli fikirlər söyləmişdir. Biz yeri gəldikcə bu fikirləri uşaqların diqqətinə çatdırır, əsas dövlət atributları olan bayraq, gerb və himnin mənasını onlara izah edir, himnimizi ifa etməyi öyrədirik.

Bütün bunlar təbii ki, hələ kiçik yaşlardan uşaqların güclü vətənpərvərlik hissinə yiyələnməsinə, gələcəyin fəal vətəndaşı kimi böyüməsinə, vətənin, torpağın mübariz müdafiəçiləri kimi yetişməsinə müsbət təsir göstərir. 

Sədaqət RƏHİMOVA,
Bakının Xətai rayonundakı 240 nömrəli körpələr evi-uşaq bağçasının müdiri