Azərbaycan Dillər Universitetində İspan dili mərkəzinin açılış mərasimi keçirildi.  Açılış rəmzini bildirən qırmızı lent kəsildi. Mərasimdə çıxış edən ADU-nun rektoru Səməd Seyidov rəhbərlik etdiyi ali təhsil ocağında tarixi bir gün yaşandığını bildirdi. Cənubi Qafqaz regionunda ən böyük Amerika mərkəzinin ADU-da fəaliyyət göstərdiyini deyən S.Seyidov təhsil müəssisəsində 15-ə yaxın əcnəbi dilin tədris olunduğunu, eləcə də mərkəzlərinin fəaliyyət göstərdiyini qeyd etdi.  Bir müddət öncə ADU-da Höte İnstitutunun filialının fəaliyyətə başlamasından danışan rektor  təhsil müəssisəsində  ispan dili mütəxəssislərinin, həmçinin İspaniyadan gələn müəllimlərin çalışdığını vurğuladı.  ADU-nun rektoru ispan dilinin Azərbaycanda öyrənilməsinin xüsusi əhəmiyyət kəsb etdiyini söylədi.    Rektor mərkəzin ispan dilinin, mədəniyyətinin öyrənilməsində tələbələrə, eləcə də bütün maraqlı şəxslərə yararlı olacağına əminliyini ifadə etdi. O, mərkəzin İspaniya mədəniyyətinin Azərbaycanda, Azərbaycan mədəniyyətinin İspaniyada təbliği istiqamətində vacib rol oynayacağını dedi. ADU-nun rektoru şəxsi kitabxanasından İspan dili mərkəzinə kitablar hədiyyə etdi.

Tədbirdə çıxış edən İspaniya Krallığının Azərbaycandakı fövqəladə və səlahiyyətli səfiri Kristobal Qonsales - Aller Xurado dost münasibətinə və mərkəzin fəaliyyəti üçün yaradılan şəraitə görə ADU-nun rektoruna öz təşəkkürünü bildirdi. Mərkəzin açılmasında əməyi olan şəxslərə  minnətdarlığını ifadə edən  Kristobal Qonsales - Aller Xurado mərkəzin ispan dilinin tədrisində və təbliğində mühüm rola malik olduğunu qeyd etdi: "Ölkələrimiz arasında olan mədəni, eləcə də digər əlaqələrin bundan sonra da artan tempdə inkişaf edəcəyinə ümidvaram. Mərkəzin gələcək inkişafı üçün öz dəstəyimi əsirgəməyəcəyəm". İspan dili kafedrasının müəllimi, İspaniya vətəndaşı Anxel Konde Munyoz isə çıxışında pedaqoji fəaliyyətinə toxundu. ADU-da peşəkar ispan dili mütəxəssislərinin olduğunu deyən A.K.Munyoz belə bir kollektivdə çalışmaqdan məmnun olduğunu bildirdi. İspaniyalı pedaqoq mərkəzin açılmasını ispan dilinə və mədəniyyətinə verilən töhfə kimi qiymətləndirdi.

İspan dili mərkəzinin təmsilçisi, II kurs magistri  Günel Hacıyeva "İspan dili günləri",  İspan dili kafedrasının müəllimi, DELE imtahanlarının Azərbaycandakı təmsilçisi Elvira İmanova  İspaniyanın Servantes İnstitutunda keçirilən DELE imtahanları və əhəmiyyəti,  "Azərbaycan-Latın Amerika Gəncləri" İctimai Birliyinin sədri, ADU-nun tərcümə fakültəsinin IV kurs tələbəsi Mahir Qurbanov isə rəhbəri olduğu təşkilat, onun fəaliyyət istiqamətləri və həyata keçirdiyi tədbirlər haqqında məlumat verdilər. İspan dili kafedrasının müdiri Aybənisə Əliyeva Azərbaycanda ispan dilinin tədrisinin 20 ilinin tamam olduğunu, bununla bağlı tədbirlər planı həyata keçiriləcəyini  bildirdi.

Sonda tədbir iştirakçıları İspan dili mərkəzində yaradılmış şəraitlə tanış oldular. 

Şakir CƏFƏROV