Bakıdakı 204 nömrəli tam orta məktəbin şagirdləri aprelin 18-də keçirdikləri "Dünya bizim evimizdir" adlı ekoloji tədbirlərini Yer gününə həsr etmişdilər.

Şagird aparıcılar tədbiri açdıqdan sonra Yer planeti haqqında qısametrajlı film nümayiş olundu. Filmdə planetimizin mənzərəli yerlərindən, zəngin flora və faunasından görüntülər əksini tapmışdı. Filmi şagird aparıcının dünyamız haqqında verdiyi ümumi məlumat müşayiət edirdi. Məlumatda Yerin bizim vahid evimiz olması, planetin səthinin böyük hissəsini su təşkil etməsi, dünya okeanlarının iqlimə təsiri, ilk həyatın okeanda olması və s. kimi bilgilərdən söz açılırdı.

Aparıcıların söylədikləri "Amma çox təəssüf ki, bu gözəl planetimiz insan əli ilə bəzən korlanır" sözlərindən sonra ekrandakı gözəl mənzərələri ekologiyanın çirklənməsini əks etdirən epizodlar əvəz etdi.

Sonra ekologiyanı qorumaq üçün dünyada və ölkəmizdə görülən işlər barədə məlumat verildi. Qeyd olundu ki, BMT bu məqsədlə 1970-ci ildə aprelin 22-ni Beynəlxalq Yer günü elan edib. Artıq 42 ildir ki, bu gün ekoloji aksiyalarla qeyd olunur. Şagirdlər bildirdilər ki, ölkəmizdə ekologiyanın qorunması, ekoloji problemlərin həlli istiqamətində mühüm işlər görülür. Bu məsələ daim dövlətimizin diqqət mərkəzindədir.

Tədbirdə Azərbaycanda ekoloji problemlərlə bağlı şagirdlərin hazırladıqları slaydlar proyektor vasitəsi ilə nümayiş olundu.

Sonra şagirdlər ekologiyanın çirkləndirilməsi və buna qarşı mübarizə mövzusunda səhnəcik nümayiş etdirdilər.

Aparıcılar ekologiyanın qorunması istiqamətində məktəbin rəhbərliyi və müəllimlərin köməyi ilə həyata keçirilən tədbirlərdən danışdılar. Bildirdilər ki, "Havada oksigen qazının artması üçün sən də bir addım at" adı altında keçirilən aksiyaya məktəbin 7-ci sinif şagirdləri də qoşulmuş, çoxlu ağac və gül kolları əkmişlər. Aksiya çərçivəsində bukletlər hazırlanaraq əhaliyə paylanıb.

Aksiyadan hazırlanmış slaydlar göstərildi. Şagirdlər aksiyanın bir sıra ekoloji problemlərin həllinə müsbət təsir edəcəyinə inandıqlarını söylədilər.

Sonra söz tədbirin əsas təşkilatçısı olan coğrafiya müəllimi Aysel Süleymanovaya verildi. O, ekologiyanı qorumağın, ətraf mühitin çirkləndirilməsinə qarşı mübarizənin vacibliyindən danışıb məktəblilərin bu proseslərdə iştirakını təqdir etdi və tədbiri yüksək səviyyədə keçirdikləri üçün onlara təşəkkürünü bildirdi.

Coğrafiya fənnindən nümayiş etdirdikləri fəallığa görə məktəbin 7-ci sinif şagirdlərinin böyük bir qrupuna diplomlar təqdim olundu.

Tədbiri yekunlaşdıran məktəbin direktoru Ziba Rzayeva da ekoloji problemlərin yaranma səbəblərindən, ölkəmizdə onların həlli istiqamətində atılmış addımlardan danışdı. Direktor məktəblilərin keçirilən ekoloji aksiyalarda iştiraklarını, tədbirdəki çıxışlarını yüksək qiymətləndirib, onlara, habelə bu işdə əməyi olan coğrafiya müəllimi Aysel Süleymanovaya, təlim-tərbiyə işləri üzrə direktor müavini Kübra Əliyevaya təşəkkür etdi. 

Yusif ƏLİYEV