Ümummilli lider Heydər Əliyevin anadan olmasının 89-cu ildönümü münasibətilə  Naxçıvan Müəllimlər İnstitutunda "Müasir təlim metodları və yeni pedaqoji  texnologiyanın  təlim-tərbiyə prosesində tətbiqi" mövzusunda elmi-praktik konfrans keçirilmişdir. Konfransı giriş sözü ilə institutun rektoru, professor Oruc Həsənli açaraq yeni təlim metodlarının strukturu, səciyyəvi xüsusiyyətləri, yaranma səbəbləri və fənn kurikulumlarının tətbiqinin əhəmiyyəti  barədə danışmışdır. Qeyd olunmuşdur ki, 2004-cü ildən mütəmadi olaraq keçirilən konfransın məqsədi  təhsil islahatları və fənn kurikulumları ilə bağlı  ali və orta ümumtəhsil müəllimlərinin öz işlərini yeni təlim metodları əsasında  qurmalarından ibarətdir.

Sonra institutun pedaqogika və psixologiya kafedrasının baş müəllimi Lalə Allahverdiyevanın "Heydər Əliyev şəxsiyyəti siyasi-mənəvi tariximizin zirvəsi kimi", dillər və ədəbiyyat kafedrasının baş müəllimi Həsənəli Eyvazovun "Təhsil islahatını zəruri edən səbəblər və ədəbiyyat fənni kurikulumu" və Naxçıvan şəhər 9 nömrəli tam orta məktəbin müəllimi Ruhiyyə Əliyevanın  "İbtidai siniflərin Ana dili təlimində milli kurikulumla əlaqədar inteqrasiyaya aid bəzi mülahizələr" mövzusunda çıxışları dinlənilmişdir.

Konfrans öz işini 3 bölmədə - "Humanitar və pedaqoji", "Dillər və ədəbiyyat, onların tədrisi metodikası", "Təbiət elmləri və onların tədrisi metodikası" istiqamətində aparmışdır. 

Naxçıvan Müəllimlər İnstitutunun Mətbuat xidməti