Azərbaycan xalqının ümummilli lideri, görkəmli dövlət xadimi Heydər Əliyevin anadan olmasının 89-cu ildönümü ilə əlaqədar olaraq Naxçıvan Dövlət Universitetində keçirilən ənənəvi "Heydər Əliyev ongünlüyü" çərçivəsində silsilə tədbirlər davam etməkdədir. Ali məktəbin nəzdindəki Heydər Əliyev Universitetinin "Heydər Əliyev və Azərbaycan" mövzusuna həsr olunmuş 156-cı məşğələsi də bu münasibətlə təşkil olunmuşdu. Məşğələ Naxçıvan şəhərindəki Heydər Əliyev Muzeyində keçirildi. Öncə ümummilli liderin Naxçıvan şəhərindəki heykəli ziyarət olundu.

Məşğələdə Naxçıvan Dövlət Universitetinin rektoru, akademik İsa Həbibbəyli mövzu ilə bağlı əhatəli məruzə edərək Heydər Əliyevin Azərbaycan xalqı üçün liderlik və xilaskarlıq missiyasını yerinə yetirməsindən danışdı. Natiq dünya şöhrətli siyasi xadim Heydər Əliyevin Azərbaycanın müstəqilliyinin bərpası və qorunmasında, ölkənin sosial-iqtisadi tərəqqisində və dünyada tanıdılmasında böyük rol oynamasından bəhs etdi. Məruzədə qeyd olundu ki, ulu öndər fenomenal zəkaya, fitri istedada, analitik təfəkkürə malik unikal şəxsiyyət, vətənpərvərlik, xalqına və dövlətinə sədaqət nümunəsi idi. Akademik, Milli Məclisin deputatı İsa Həbibbəyli bildirdi ki, yeni Azərbaycanın böyük yaradıcısı Heydər Əliyevin dövlətçilik ideyaları bu gün də ləyaqətlə davam etdirilir və yeni nəsillər üçün əsl örnəkdir. Sonda muzeylə tanışlıq oldu. Heydər Əliyev Muzeyinin direktoru Ramin Orucəliyev ümummilli liderin mənalı ömür yolunu və siyasi fəaliyyətini əks etdirən muzeyin fəaliyyəti, buradakı yeni eksponatlar haqqında məlumat verdi. 

Mehriban SULTAN,
NDU-nun Mətbuat şöbəsinin müdiri