Aprelin 30-da Şəki Şəhər İcra Hakimiyyətində "Müasir təhsilin davamlı inkişafı: reallıqlar, perspektivlər" mövzusunda zona elmi-praktik konfransı keçirildi. Konfransda təhsil naziri Misir Mərdanov, Şəki Şəhər İcra Hakimiyyətinin başçısı Elxan Usubov, Milli Məclisin deputatı Cavanşir Feyziyev, Təhsil Nazirliyinin nümayəndələri, Təhsil Problemləri İnstitutunun əməkdaşları, Şəki şəhər, Qəbələ, Oğuz, Qax, Zaqatala, Balakən rayon təhsil şöbələrinin müdirləri, metodistlər, məktəb direktorları və digər şəxslər iştirak edirdilər. Konfransdan öncə Şəki şəhər R.Əfəndiyev adına 10 nömrəli tam orta məktəbin foyesində şagirdlərin əl işlərindən ibarət sərgiyə baxış keçirildi. Təhsil naziri Misir Mərdanov müəllimlərdən Almaz Əsədovanın III, Səbuhi Qurbanovun IX siniflərdə riyaziyyat fənnindən apardıqları "açıq dərs"lərdə iştirak etdi. Sonra konfrans iştirakçıları ümummilli lider Heydər Əliyevin şəhər icra hakimiyyətinin binası qarşısında ucaldılmış abidəsi önünə gül-çiçək dəstələri düzərək, ulu öndərə ehtiramlarını bildirdilər.

Konfransı giriş sözü ilə açan Şəki Şəhər İcra Hakimiyyətinin başçısı Elxan Usubov qonaqları salamlayaraq elmi-praktik konfransın Şəkidə keçirilməsindən məmnunluğunu ifadə etdi. Şəkinin milli mənəvi dəyərlərindən söz açan E.Usubov şəhərin qədim mədəniyyət mərkəzlərindən biri olduğunu, hələ XIX əsrdən burada qəza və rus məktəblərinin fəaliyyət göstərdiyini nəzərə çatdırdı. Bildirildi ki, Şəkidə 1831-ci ildə rus dilində açılan təhsil ocağı Azərbaycanda ilk dünyəvi məktəblərdən biridir. Şəkidə təşkil olunmuş bu məktəb maarifin inkişafına, onun yeni dünyəvi xarakter daşımasına təkan vermişdir. Bu məktəbdə Azərbaycan elminin və təhsilinin inkişafında xüsusi xidmətləri olan yüzlərlə görkəmli şəxsiyyətlər təhsil almışdır. Qeyd edildi ki, bu il Şəkidə açılmış ilk qəza məktəbinin varisi olan Şəki şəhər 5 nömrəli tam orta məktəbin 180 illik yubileyinin keçirilməsi nəzərdə tutulur. Şəhər icra hakimiyyətinin başçısı Elxan Usubov ulu öndər Heydər Əliyev siyasi kursunun layiqli davamçısı, ölkə Prezidenti cənab İlham Əliyevin təhsilə göstərdiyi diqqət və qayğı nəticəsində Şəkidə 20 yeni məktəb binasının tikildiyini, 3 məktəbin isə əsaslı təmir olunduğunu nəzərə çatdırdı. Bildirdi ki, hazırda 4 məktəb binasının tikintisi davam etdirilir. 2012-ci ildə şəhər təhsil şöbəsi üçün yeni inzibati və bir məktəb binalarının tikintisinə başlanılması, 3 məktəbin isə əsaslı təmir olunması nəzərdə tutulur.

Konfransda çıxış edən təhsil naziri Misir Mərdanov R.Əfəndiyev adına 10 nömrəli tam orta məktəbdə dinlədiyi "açıq dərs"lərin yüksək səviyyədə təşkil edildiyini vurğuladı. Hər iki müəllimin peşəkarlığına diqqət çəkən nazir regionlarda təhsilin sürətlə inkişaf etdiyini bildirdi. Son illər Şəkidə müşahidə olunan dinamik inkişafdan söz açan təhsil naziri ümummilli lider Heydər Əliyevin siyasi kursunu uğurla davam etdirən ölkə Prezidenti cənab İlham Əliyevin regionların sosial-iqtisadi inkişafına xüsusi diqqət yetirdiyini vurğuladı. Misir Mərdanov regionların sosial-iqtisadi inkişafını sürətləndirmək məqsədi ilə qəbul olunmuş Dövlət Proqramının əhəmiyyəti və proqram çərçivəsində görülmüş misilsiz işlər barədə fikirlərini bildirdi. Bölgələrdə belə tədbirlərin keçirilməsinin vacibliyini önə çəkən nazir konfransın əhatə etdiyi 6 rayonun təhsil göstəriciləri haqqında müvafiq statistik məlumatları iştirakçıların nəzərinə çatdırdı. Şəkidə və bölgədəki rayonlarda məktəbəqədər təhsil sahəsi haqqında statistik məlumatları slaydlar vasitəsi ilə göstərən nazir bu sahədə ciddi problemlərin mövcud olduğunu və məktəbəqədər təhsil müəssisələrinin azlıq təşkil etdiyini, problemin həllinə dair məsələlərin müzakirə edildiyini bildirdı.

Kadrlarla bağlı məsələlərə toxunan Misir Mərdanov müəllimlərin və tərbiyəçilərin yaş senzi ilə bağlı yaranan problemlərə həssas yanaşmağı, gənc kadrlara şərait yaradılmasını, yaşlı müəllimlərin isə bacarıq və qabiliyyətlərinə görə fəaliyyətlərinin tənzimlənməsini tövsiyə etdi. Şagird-müəllim nisbətinə toxunan təhsil naziri bu məsələnin ciddi xarakter daşıdığını və rasionallaşdırmaya ehtiyac olduğunu nəzərə çatdırdı.

Yeni fənn kurikulumlarının tətbiqi üzrə öyrədici təlimlərdən keçən müəllimlər haqqında məlumat verən nazir bu sahədə işlərin mərhələli şəkildə həyata keçirildiyini vurğuladı. Maddi-texniki təminat, məktəblərin növbəliliyi, məktəblərdə orta şagird sıxlığı, şagird-müəllim nisbəti, təhsilinə görə müəllimlərin təsnifatı, dərs yükü, pedaqoji kadrlarla təminat, ehtiyac və digər məsələlər haqqında danışan Misir Mərdanov mövcud problemlərin aradan qaldırılması üçün bir sıra tövsiyələr və tapşırıqlar verdi.

Digər çıxış edənlər mövzu ətrafında fikirlərini bildirdilər.

Niyazi RƏHİMOV