Naxçıvan  Dövlət  Universitetində görkəmli  oftalmoloq alim, akademik, əməkdar elm  xadimi Zərifə  xanım  Əliyevanın  anadan olmasının 89-cu ildönümü  münasibətilə  yığıncaq  keçirildi.

Ali məktəbin tibb fakültəsində keçirilən tədbiri giriş sözü ilə elmi işlər üzrə prorektor, fizika-riyaziyyat elmləri üzrə fəlsəfə doktoru, dosent Anar Kazımov açaraq   akademik  Zərifə Əliyevanın  həyat və fəaliyyətindən  bəhs etdi.  Qeyd olundu ki,  görkəmli alim  ömrünü oftalmologiya sahəsinin inkişafına, göz xəstəliklərinin müalicəsinə həsr etmişdir.  O, Azərbaycan Elmi-Tədqiqat Oftalmologiya İnstitutunda  və Azərbaycan Dövlət Həkimləri  Təkmilləşdirmə İnstitutunda fəaliyyət göstərərkən müxtəlif istiqamətlərdə elmi araşdırmalar  və tədqiqatlar aparmış,  cərrahi əməliyyatlar həyata keçirmiş,  gözdə qlaukoma xəstəliyinin diaqnostikası və müalicəsi baxımından bir neçə elmi-metodoloji  fikirlər irəli sürmüş,  göz həkimlərinin təkmilləşdirilməsi  üçün pedaqoji fəaliyyət göstərmişdir.  Vurğulandı ki, o,  istedadlı alim və bacarıqlı pedaqoq olmaqla yanaşı, eyni zamanda qayğıkeş, xeyirxah və işgüzar qadın, gözəl ailə başçısı idi.   

Sonra müalicə işi ixtisası üzrə I kurs tələbəsi, Prezident  təqaüdçüsü  Sara Əzizova "Zərifə Əziz qızı Əliyevanın həyatı", tibbi profilaktika ixtisası üzrə III kurs tələbəsi Səma Mədətli "İnsanlara nur bəxş edən ləyaqət mücəssəməsi", pediatriya ixtisası üzrə II kurs tələbəsi Günay Quliyeva "Oftalmologiyamızın tükənməz xəzinəsi",  həmin ixtisas üzrə V kurs tələbəsi Osman Cəfərli "O, bu xalqın gözünün nurunu qoruyurdu" adlı məzmunlu məruzələrlə  çıxış etdilər.  Məruzələrdə qeyd olundu ki, Zərifə xanımın xatirəsi daima ürəklərdə yaşayacaq,  ömür yolu və gördüyü fundamental  işlər heç vaxt unudulmayacaq.  Ümumi təbabət və gigiyena  kafedrasının müdiri, tibb elmləri üzrə fəlsəfə doktoru, dosent Malikəjdər İbrahimov çıxış edərək xatirə və ürək sözlərini bölüşdü. 

Tədbirdə Zərifə xanım Əliyevanın həyatını əks etdirən slayd da nümayiş olundu. 

Nərmin CƏFƏROVA,
NDU-nun Mətbuat şöbəsinin əməkdaşı