Azərbaycan Dövlət Pedaqoji Universitetinin kimya-biologiya ixtisası üzrə 304-cü və kimya ixtisası üzrə 302-ci qruplarının tələbələri martın 30-dan Bakıdakı Məzahir Məmmədov adına 37 nömrəli tam orta məktəbdə pedaqoji təcrübə keçirlər. Onlara məktəbin direktoru, kimya üzrə fəlsəfə doktoru, dosent İkram Əliyev, biologiya üzrə fəlsəfə doktoru Rafiq Əmrahov və kimya üzrə fəlsəfə doktoru, ümumi kimya və kimyanın tədrisi kafedrasının dosenti  Faiq Məmmədov rəhbərlik edirlər.

Tələbələrin pedaqoji təcrübəsi mayın 17-dək davam edəcək və onlar bu müddət ərzində öz nəzəri biliklərini praktikada bir daha möhkəmləndirəcəklər. Ayşən Bağırlı, Aysel Məmmədova, Aytən Şəmiyeva, Aygül Əkbərli, Ayşən Qəfərova, Günay Dadaşzadə və Güllü Atakişiyeva universitetdə olduğu kimi, burada da ilk günlərdən başqalarından fərqlənirlər. Məktəbin tədris işləri üzrə direktor müavini Zəminə Cəfərova, təlim-tərbiyə işləri üzrə direktor müavini Natella Əliyeva, kitabxana müdiri Yeganə Əliyeva, kimya və biologiya fənlərini tədris edənlər - Tahirə Ələkbərova, Lətafət Əliyeva, Rəhilə Allahverdiyeva və digər fənn müəllimləri gələcəkdə pedaqoji fəaliyyətə başlayacaq tələbələrə hərtərəfli qayğı göstərirlər.

Dosent Rafiq Əmrahov: - Pedaqoji təcrübə gələcək müəllim hazırlığı üçün vacib sınaqdır. Müəllim hazırlığında məktəb əsas amildir. Məktəbdə savadlı müəllimlər üçün şərait olanda bu, tələbələrin hazırlığına öz müsbət təsirini göstərir. 37 nömrəli tam orta məktəbdə pedaqoji təcrübə üçün hər cür şərait vardır. Məktəbin direktoru İkram Əliyev müasir təhsil qanunlarına cavab verən müəllim hazırlığına var-gücünü sərf edir. O, ümummilli lider Heydər Əliyevin müəllim haqqında söylədiyi fikirləri yüksək dəyərləndirən, söhbətlərində tez-tez vurğulayan məktəb direktorlarından biridir. İkram müəllim yüksək idarəetmə bacarığına malikdir. Təsadüfi deyildir ki, iki il ərzində o, məktəbdə təhsil və tərbiyə işində irəliləyişə nail olub. Müəllimlik peşəsi şərəfli və eyni zamanda çətin və məsuliyyətlidir. Ulu öndər Heydər Əliyev hər zaman təhsilə böyük diqqət yetirib, müəllimlərə xüsusi hörmət və ehtiramla yanaşıb, onların əməyini yüksək qiymətləndirib. Ümummilli liderin layiqli davamçısı Prezident İlham Əliyev də təhsilimizin, elmimizin inkişafına, biz müəllimlərə, həmçinin böyüməkdə olan gənc nəslə daim diqqət və qayğı göstərir. Elə tələbələrimizin pedaqoji təcrübə keçdiyi 37 nömrəli tam orta məktəbin ötən il əsaslı təmir olunması və maddi-texniki bazasının möhkəmləndirilməsi buna canlı misaldır.

304-cü qrupun tələbəsi Güllü Atakişiyeva: - Biz ilk dəfə məktəbə pedaqoji təcrübəyə gələndə çox həyəcanlı idik. Bizi ilk qarşılayan Zəminə müəllim bu həyəcanı tamamən aradan qaldırdı. Sonra Tahirə müəllim ilə tanış olduq. O da bu işdə bizə yardımçı oldu. Məktəbin direktoru İkram müəllim başda olmaqla pedaqoji kollektivin bizə göstərdiyi diqqət və qayğıya layiqincə cavab verməyə, pedaqoji təcrübəni fəal keçirməklə çox şey öyrənməyə, müəyyən bacarıqlara yiyələnməyə çalışırıq.

İnanırıq ki, tələbələrin pedaqoji təcrübəsi uğurla başa çatacaq. Bu günlər uzun müddət sabahın müəllimlərinin yaddaşından silinməyəcək, xoş təəssüratlarla xatırlanacaq. Hələliksə, biz 37 nömrəli tam orta məktəbin pedaqoji kollektivinə və pedaqoji təcrübə keçən tələbələrə uğurlar diləyirik. 

Mahmud VƏLİ