Naxçıvan Dövlət Universitetinin memarlıq və mühəndislik fakültəsində kompüter şəbəkələri və proqramlaşdırma laboratoriyasının açılışı oldu.

Tədbirdə universitetin rektoru, akademik İsa Həbibbəyli çıxış edərək XXI əsrin informasiya texnologiyaları əsri olduğunu, Azərbaycanda bu sahənin inkişafına xüsusi diqqət göstərildiyini vurğuladı. Qeyd olundu ki, elmin, təhsilin tərəqqisi, inteqrasiya baxımından ən son texnologiyaların mənimsənilməsi və tətbiqi universitetdə də uğurla həyata keçirilir. Burada müxtəlif kompüter və İnternet mərkəzləri fəaliyyət göstərir, əksər auditoriyalar elektron lövhələr və proyektorlarla təchiz olunmuşdur. "Wi-Fi" kampus İnternet şəbəkə sistemi universitetin nəinki tədris korpuslarında, bütövlükdə 108 hektarlıq ərazisində sürətli İnternet bağlantısından istifadə etməyə imkan verir. Elektron universitet yaradılması, tədrisin elektronlaşdırılması istiqamətində əhəmiyyətli işlər görülür. Bu ali məktəbdə beynəlxalq səviyyəli videokonfransların, videobağlantıların və online dərslərin təşkili ənənəvi hal almışdır. Rektor çıxışında yeni laboratoriyanın müasir informasiya-kommunikasiya texnologiyalarının iş prinsiplərinin, kompüter arxitekturasının əyani şəkildə öyrənilməsi, ixtisaslı mütəxəssislərin yetişməsindəki rolundan danışdı. Rabitə və informasiya texnologiyaları kafedrasının müdiri, dosent Cavanşir Zeynalov "İnformasiya-kommunikasiya texnologiyalarının təhsildə rolu" mövzusundakı məruzəsində virtual dərslərin, elektron imtahanların keçirilməsi, müasir texnologiyaların tədris prosesinə tətbiqi barədə danışdı. Yeni laboratoriyada kompüter mühəndisliyinin öyrənilməsi məqsədilə kompüter hissəcikləri və onların iş prinsiplərini əks etdirən stendlər, tələbələr tərəfindən hazırlanmış yeni proqramlar, kompüter şəbəkələrinin rolu haqqında ətraflı məlumat verildi.

Kafedranın müəllimi Hüseyn Qasımov hazırladığı məsafədən idarəetmə qurğusunu nümayiş etdirərək onun iş prinsipini izah etdi. Komputer vasitəsilə idarə edilən yeni qurğunun sənaye, kənd təsərrüfatı, gündəlik məişətdə tətbiqi səmərəlilik baxımından yüksək qiymətləndirildi.

Sonra tələbələr tərəfindən hazırlanmış viktorina proqramının təqdimatı oldu. Aparıcı kompüterlə iştirakçıların kompüterləri arasında naqilsiz əlaqə, qiymətləndirmənin avtomatlaşdırılmış şəkildə aparılması ayrıca maraq doğurdu.

Sonda rektor, akademik İsa Həbibbəyli kompüter şəbəkələri və proqramlaşdırma laboratoriyasındakı iş prosesi, tələbələrin hazırladıqları yeni kompüter proqramları ilə tanış oldu.  

Mehriban SULTAN,
NDU-nun Mətbuat şöbəsinin müdiri