Bakının Nəsimi rayonundakı Texniki Humanitar Liseydə "Elimizə Novruz gəlir" adlı bayram tədbirindən əvvəl şagirdlərin Novruza həsr etdikləri divar qəzetlərinə və müxtəlif bayram şirniyyatlarına, "Bahar" rəsm sərgisinə baxış keçirildi. 

Tədbiri giriş sözü ilə açan liseyin  direktoru Ellada Qasımova iştirakçıları bayram münasibəti ilə təbrik etdi.

Milli ruhda bəzədilmiş səhnədə al-əlvan geyinmiş şagirdlərin əllərindəki səməni, nərgiz gülü baharın gəlişindən xəbər verirdi. Onlar növbə ilə bahar bayramı haqqında şeirlər, mahnılar ifa etdilər. Novruz bayramının tarixindən, su, od, yel, torpaq çərşənbələriylə bağlı adət-ənənələrindən, mərasimlərdən söz açdılar.

Milli geyimdə şagirdlərin ifasında rəqs nömrələri göstərildi. Tonqala od vuruldu.  Ağ atın üstündə Bahar qızı meydana gəldi. Şənliyi daha da maraqlı və yaddaqalan edən Bahar qızı iştirakçıları Novruz bayramı münasibəti ilə təbrik etdi. Xalqımıza sülh və əmin-amanlıq, bol ruzi-bərəkət arzuladı.  Novruzun əsas atributlarından olan Kosa ilə Keçəlin duzlu, məzəli çıxışları və rəqsləri  şagirdlərdə yazla qışın görüşü təəssüratını yaratdı.

Rəşad ZİYADOV