Naxçıvan Özəl Universitetində pedaqoji fakültənin əyani şöbə üzrə III kurs tələbələrinin 2011-2012-ci tədris ilinin ikinci yarısında keçəcəkləri pedaqoji təcrübəyə həsr olunmuş başlanğıc konfransı keçirilmişdir.

Konfransda universitetin rektoru, professor İsmayıl Əliyev çıxış edərək bildirmişdir ki, tələbələrin gələcəyin savadlı, bilikli müəllimi, eləcə də mütəxəssis kimi formalaşmasında pedaqoji təcrübənin rolu danılmazdır. Məhz buna görədir ki, tələbələr təhsil müddətində aldıqları bilikləri pedaqoji təcrübə zamanı sınaqdan keçirirlər. O da vurğulanmışdır ki, pedaqoji fakültənin 5 ixtisas üzrə 114 tələbəsi Heydər Əliyev adına məktəbdə, Naxçıvan şəhər 8 və 15 nömrəli tam orta məktəblərdə 4 həftə müddətində pedaqoji təcrübə keçəcək.

Universitetin  tədris və elmi işlər üzrə prorektoru İbrahim Kazımbəyli "Müəllim hazırlığında pedaqoji təcrübənin rolu və qarşıda duran əsas vəzifələr", pedaqogika və psixologiya kafedrasının müdiri Solmaz Həsənova "Pedaqoji və psixoloji rəhbərlərin vəzifələri" və pedaqoji təcrübə üzrə metodist Nazim Mahmudov "Təcrübənin təşkili, gedişi və yekunlaşdırılması"  barədə ətraflı məlumat vermişlər. 

Nuray ƏSGƏROVA,
Naxçıvan Özəl Universitetinin əməkdaşı