ARXİV

08 Mart - № 10

Beynəlxalq təhsil xəbərləri

Rusiyada özəl məktəblər dövlət tərəfindən maliyyələşdiriləcək

Rusiyada özəl məktəblər və uşaq bağçaları dövlət tərəfindən maliyyələşdiriləcək. "Uçitelskaya qazeta"nın yazdığına görə, RF prezidenti Dmitri Medvedev bu barədə müvafiq qanun imzalayıb. Tələbələr ali məktəblərdə İnternet vasitəsi ilə elektron təhsil ala biləcəklər. Ekspertlər yeniliyi müsbət dəyərləndirir: uşaq bağçalarına növbələr azalacaq, özəl məktəblərdə təhsil valideynlər üçün daha ucuz başa gələcək, əlillər öz evlərindən çıxmadan ali təhsil ala biləcəklər.   

Prezident ali məktəblərdə distant təhsilin tətbiqinə dair də qanun imzalayıb. Qanun "elektron təhsil" anlayışını tətbiq edir. Lakin bu sistemin həyata keçirilməsi üçün mövcud təhsil standartları dəyişməlidir.  Dövlət standartlarında elektron təhsildən istifadəni təmin edən şəraitin, eləcə də distant təhsil texnologiyalarının  yaradılması tələbləri əksini tapmalıdır.  Elektron təhsilin  kifayət qədər ucuz olmasına diqqət çəkən ekspertlər bu sistemin bütün dünya ölkələrində tətbiq olunduğunu bildirirlər.

Çexiyada on yeddi min müəllim işdən azad olunacaq

Gürcüstanda bütün məktəblər Amerika məktəbləri səviyyəsinə çatdırılacaq

Gürcüstan prezidenti Mixail Saakaşvili parlamentdə illik hesabat məruzəsində  bildirib ki, 2012-ci ildə ölkədə 23 yeni məktəb istifadəyə veriləcək və fəaliyyətdə olan 600-dən artıq məktəb binası təmir olunacaq. Prezident bəyan edib ki, hökumətin planlarına uyğun olaraq, 2015-ci ildə Gürcüstanın bütün məktəbləri Amerika və Almaniyanın məktəbləri səviyyəsində, hətta daha üstün səviyyədə olacaq.  "Biz bu il ölkənin hər yeddi məktəblisindən birinin  fərdi kompüterə malik olmasına nail olmağa çalışacağıq, 2015-ci ildə məktəblilərin 90 faizi artıq  fərdi kompüterlərə sahib olacaq. Cari ildə 100 məktəbdə gələcəyin müasir məktəbləri (kompüterləşdirilmiş siniflər), kimya, fizika, biologiya laboratoriyaları açılacaq",-deyə prezident bildirib.

Daha sonra tələbələrlə görüşündə prezident Mixail Saakaşvili qeyd edib ki,  gələn ildən başlayaraq dövlət tələbələrin xarici ölkələrdə təhsili proqramlarını genişləndirəcək. 

"Biz əsasən texnoloji fakültələri maliyyələşdiririk. Gələn ildən isə həm də humanitar ixtisaslar üçün də kvota müəyyən olunacaq. Biz istərdik ki, xaricə oxumağa göndərilən vətəndaşlarımız maksimum dərəcədə çox olsun. Bundan başqa, biz xaricdən daha çox pedaqoq cəlb etməliyik. Xarici dilləri bilmədən yeni texnologiyaları idarə etmək mümkün deyil. Buna görə də tələbə xarici dili bilməlidir", -deyə dövlət başçısı bildirib.   Prezident deyib ki, yaxın gələcəkdə Batumidə yüksək səviyyəli, mükəmməl, əsl Amerika texnoloji universiteti açılacaq və bu, bizim təhsil sistemində ciddi irəliləyiş olacaq.  

Fransada universitetlər birləşir

Cari ilin sonlarına qədər Fransa təhsil sistemində aparılan islahatlar başa çatdırılacaq. 2008-ci ildən başlamış islahatlar artıq yekun mərhələyə qədəm qoyub. Hökumət islahatlara 22 milyard avro sərf edəcək.   İslahatlar nəticəsində ölkənin 87 universiteti əsasında 10 universitet yaradılcaq. İri universitetlər fəaliyyətlərini davam etdirmək üçün hökumətdən maliyyə dəstəyi alacaq. Hazırda ölkədə 300-ə yaxın ali məktəb var. Onlardan 87-i universitetdir. Kiçik ali təhsil müəssisələri möhkəmləndirilmiş, yenidən qurulmuş universitetlərin fakültələri olacaq.   Ötən il Bordo, Strasburq universitetləri  və Paris Elm Mərkəzi sertifikatlar alıblar. Bordo universiteti 8, Strasburq universiteti 3, Paris Elm Mərkəzi 13 ali təhsi müəssisəsini özündə birləşdirib. Hər bir yeni təhsil mərkəzi öz ehtiyacları üçün  ildə 40 milyon avro alacaq. Hökumət xırda ali təhsil müəssisələrini özündə birləşdirməklə böyüyən daha 5 universitetin adını açıqlayıb. Bunlar Sorbon Universiteti, 2 Paris universiteti, Marsel, Tuluza universitetləridir.    

Hökumət ümid edir ki, dəyişikliklər dünya səviyyəsində Fransa təhsilinin  nüfuzunu qaytarmağa imkan verəcək, yeni universitetlərin rəqabət qabiliyyətini gücləndirəcək. Hökumətin islahatların başa çatdırılması üçün ayırdığı 22 milyard avrodan yarısı yeni təhsil proqramlarına, 8 milyardı elmi tədqiqat fəaliyyətinin dəstəklənməsinə, 5 milyardı Parisdə möhkəmləndirilmiş universitetlərin yaradılmasına xərclənəcək.  Cari ilin sonlarına kimi öz fəaliyyətlərini davam etdirmək üçün dövlətdən dotasiya alacaq ali məktəblərin üçüncü qrupuna daxil olan təhsil müəssisələrinin adları məlum olacaq. 2015-ci ilə kimi bütün seçilmiş təhsil müəssisələri eyni dərəcədə dəstəklənəcək, sonra isə onların fəaliyyətini elmi məqalələr və məzunların sayı  qiymətləndirəcək.

Fransa pulsuz ali təhsilə dövlət təminatının mövcud olduğu Avropa ölkələrindən biridir. Ötən il 3 milyon tələbədən 2,5 milyonu pulsuz oxuyub. Onların 15 faizi əsasən Afrika ölkələrindən olan tələbələrdir. Hər bir tələbənin oxuması hökumətə 8 min avroya başa gəlib. Bununla belə, dünya universitetlərinin  reytinq cədvəllərində Fransa ali təhsili aşağı mövqedədir. Ən yaxşı fransız ali məktəbi Şanxay reytinq cədvəlində 40-cı yeri tutub.

Böyük Britaniyada birincilər tərk edilmiş binalarda oxumalı olacaqlar

Böyük Britaniyanın "Telegraph" qəzetinin yazdığına görə, məktəblərin çatışmazlığı üzündən ingiltərəli birincilər tərk edilmiş binalarda və zirzəmilərdə oxumalı olacaqlar.  Qeyd olunur ki, ölkədə ibtidai məktəb yaşlı uşaqların sayı artır, 2015-ci ildə onların sayı 450000-i keçəcək. Buna səbəb kimi yüksək doğum göstəriciləri və daimi immiqrasiya göstərilir. Artıq ölkənin bir sıra regionlarında kiçikyaşlı məktəblilərin həddən artıq çoxluğu müşahidə olunur. Bu problem London,  Dorset, Somerset, Bristol və Noric kimi şəhərlərdə, Çeşir qraflığında  daha kəskindir. Böyük Britaniya qanunlarına görə, məktəblər uşaqların yaşadığı evdən 30 mil (1 mil - 1609 metr) uzaqda yerləşməlidir. Lakin adıçəkilən regionlarda sadəcə olaraq bu qədər təhsil müəssisəsi yoxdur. Vəziyyətdən yeganə çıxış yolu isə tərk edilmiş binalardan sinif otaqları kimi  istifadə olunmasıdır. Bristoldakı məktəblərdən birində ibtidai sinif şagirdləri artıq tərk edilmiş binanın zirzəmisinə köçüblər. Portisxeddə isə məktəblilərin bir qismi keçmiş mağaza binasında oxuyurlar. Böyük Britaniyanın Təhsil Nazirliyi problemin bu cür həllindən narahatlığını bildirir - tərk edilmiş və köhnə evlərin zirzəmisində uşaqlar özlərini narahat hiss edəcəklər. Bundan başqa, bu cür yerlərdə müasir texnikanı yerləşdirmək də çətindir. Təhsil Nazirliyinin rəsmi nümayəndəsi Stiven Tviqq populyar "The Independent" qəzetinə verdiyi açıqlamada köhnə binalardan istifadənin həmişəlik deyil,  müvəqqəti tədbir olduğunu deyib.   

Biologiyada inqilabi kəşf

Amerikanın Vermont Universitetinin alimləri biologiya sahəsində   inqilabi kəşfə imza atıblar. Alimlər müəyyən ediblər ki, elmə məlum olan I, II, III və IV qan qruplarından əlavə daha iki - Langerays və Cunior adlandırılan qan qrupları mövcuddur. Bioloqlar hesab edir ki, bu qan qruplarının aşkar olunması bəzi insanlar üçün "həyat və ölüm məsələsi"dir. Tədqiqat qrupunun rəhbəri Brayan Ballifin sözlərinə görə, qanköçürmə zamanı Langerays və Cunior tipli qan qruplarının uyuşmazlığı probleminə nadir hallarda rast gəlinir.  Lakin müəyyən etnik qruplar böyük riskə məruzdur.     

"50 mindən artıq yaponiyalı mənfi rezus-faktorlu Cunior qan qrupuna malikdir və buna görə də onlar qanköçürmə zamanı problemlərlə, ana və dölün uyuşmazlığı ilə üzləşə bilərlər",-deyə Ballif bildirib.  

Fransız və yaponiyalı həmkarların yaxından iştirakı ilə amerikalı bioloqlar mass-spektrometrin köməyi ilə ABCB6 və ABCG2 eritrositlərinin səthində Langerays və Cunior tipli  qan qruplarını müəyyən edən iki zülal aşkar ediblər.  Onlar daşıyıcı zülallara aiddir (bu zülallar hüceyrə daxilində və kənarda metabolitlərin, ionların daşınmasında iştirak edirlər).

Ballif qeyd edir ki, son tədqiqatların nəticələrindən xərçəng xəstəliyinin müalicə üsullarının (xüsusən də süd vəzisi xərçəngi) yaxşılaşdırılmasında istifadə oluna bilər.

AZƏRBAYCAN
RESPUBLİKASI
TƏHSİL
QANUNU

ƏN YAXŞI
MÜƏLLİMLƏR

ƏN YAXŞI
MƏKTƏBLƏR

700 BAL
TOPLAYANLAR