Martın 5-də Bakıdakı  30 nömrəli tam orta məktəbdə təhsil islahatı və Milli Kurikulumun tətbiqi çərçivəsində  Metodiki Resurs Mərkəzinin açılış mərasimi keçirilib.

Əvvəlcə qonaqlar  "Riyaziyyat" və "Azərbaycan dili və ədəbiyyat" fənn aylıqları çərçivəsində məktəbdə görülən işlər, şagird və müəllimlərin yaradıcılıq nümunələri, 20 Yanvar faciəsi  və Xocalı soyqırımı qurbanlarının xatirəsinə həsr olunmuş divar qəzetlərindən və fotolardan ibarət sərgi ilə tanış oldular. Sonra Metodiki Resurs Mərkəzinin açılış rəmzi olan qırmızı lent kəsildi. Məktəbin direktoru Həqiqət İsmayılova mərkəzdə görülən işlər haqqında ətraflı məlumat verdi. Qeyd olundu ki, mərkəzdə qədim sənətkarlıq nümunələrini özündə birləşdirən Azərbaycan tarixinə aid guşə yaradılıb. Milli Kurikulumların tətbiqinə dair divar qəzetləri, jurnallar, fotoguşələr, həmçinin müəllim və şagirdlərin yaradıcılıq işlərindən ibarət sərgilər tərtib edilib.

Açılış mərasimi məktəbin akt zalında  şagirdlərin ifasında ədəbi-bədii kompozisiya ilə davam etdi. Dövlət himninin oxunması ilə başlanan tədbirə üçrəngli Dövlət bayrağı gətirildi. Ulu öndər Heydər Əliyevin təhsillə bağlı fikirləri  səsləndirildi. Aparıcılar müasir Azərbaycanın qurucusu  ümummilli lider  Heydər Əliyevin bütün sahələrdə olduğu kimi təhsilə göstərdiyi diqqətindən, qayğısından danışdılar. Dedilər ki, ulu öndərimiz Heydər Əliyev xalqımızın gələcəyi olan uşaqları çox sevir, onların savadlı və vətənpərvər olmasını arzu edirdi. Sevindirici haldır ki,  ulu öndərin Azərbaycanın çiçəklənməsi naminə  apardığı siyasəti Prezident İlham Əliyev uğurla davam etdirir. Şagirdlərin ifasında ümummilli lider Heydər Əliyevə həsr olunmuş şeirlər və mahnılar səsləndi.

Elm dünyasına səyahət edən şagirdlər inkişafın açarı olan elmə həsr olunmuş şeirlər dedilər, rəqs nömrələri göstərib, mahnılar ifa etdilər. 1-dən 5-ə kimi qiymətlərin səhnəciyi ilə davam edən tədbirdə  dilimizin gözəlliklərinin bədii ifadəsi kimi təqdim olunan  xalq şairi Bəxtiyar Vahabzadənin "Ana dilim" şeiri tədbir iştirakçıları tərəfindən maraqla qarşılandı.

Məktəbin direktoru Həqiqət İsmayılova tədbirdə iştirak edən qonaqları salamlayaraq təhsil müssisəsinin uğurları barədə danışdı. Bildirdi ki, məktəb bu il ali məktəblərə qəbula görə xeyli fərqlənib.

BŞTİ-nin Metodiki Mərkəzinin direktor müavinləri  Nadir Əliyev və Sitarə Məmmədova çıxışlarında məktəbdə həyata keçirilən işləri yüksək qiymətləndirərək pedaqoji kollektivə təhsil islahatlarının həyata keçirilməsində uğurlar arzuladılar. 

R.RAMAZANOĞLU