Martın 6-da Azərbaycan Dillər Universitetində 8 mart-Beynəlxalq Qadınlar gününə həsr edilmiş tədbir keçirildi. Universitetin tərbiyə işləri üzrə prorektoru Ələddin Əliyev universitet rəhbərliyi adından ADU-da çalışan xanım əməkdaşları, eləcə də zərif cinsin nümayəndələri olan tələbələri təbrik etdi. İstər cəmiyyətdə, istərsə də universitetdə xanımların özünəməxsus yeri olduğunu söyləyən prorektor onlara işlərində və şəxsi həyatlarında müvəffəqiyyətlər dilədi. Bildirildi ki, Azərbaycan Respublikasının Prezidenti İlham Əliyevin sərəncamı ilə mükafatlandırılan xanımlar arasında ADU-nun beynəlxalq əlaqələr üzrə prorektoru Jalə Qəribova da var. Bundan əlavə, Ə.Əliyev qeyd etdi ki, ADU-nun rektoru, millət vəkili, professor Səməd Seyidovun əmri ilə universitet həyatında fəal iştiraklarına görə fakültə və şöbələrdə çalışan bir qrup qadın əməkdaşa təşəkkür elan edilib.

ADU Müəllim Azad Həmkarlar Təşkilatının sədri Misgər Məmmədov da öz növbəsində universitetin qadın əməkdaşlarını bayram münasibətilə təbrik etdi. Qeyd etdi ki, rəhbərlik etdiyi təşkilat adından kafedra və strukturlarda çalışan qadınların bir qrupuna pul mükafatı təqdim edilib.

Beynəlxalq Qadınlar gününə həsr edilmiş bayram tədbiri daha sonra tanınmış müğənnilərin, eləcə də universitet tələbələrinin ifasında konsert proqramı ilə yekunlaşdı.     

Şakir CƏFƏROV