Bakı Dövlət Universitetinin rektoru, akademik Abel Məhərrəmov  Pakistan İslam Respublikası Senatının sədr müavini Mir Can Camalinin başçılıq etdiyi nümayəndə heyəti ilə görüşüb. Görüşdə Azərbaycan-Pakistan iqtisadi, siyasi və mədəni əlaqələri barədə fikir mübadiləsi aparılıb, Pakistan İslam Respublikası Senatı tərəfindən Ermənistanın Azərbaycana təcavüzü və Xocalı soyqırımını tanıyan qətnamənin əhəmiyyəti qeyd edilib.  

Həmçinin iki ölkənin ali təhsil müəssisələri arasındakı əlaqələrdən də məmnunluq ifadə olunub. 2001-ci ildən  Bakı Dövlət Universitetinin şərqşünaslıq fakültəsində urdu dilinin tədris edildiyini bildirən rektor qeyd edib ki, hazırda bu ixtisas üzrə 32 tələbə təhsil alır və tələbələrə urdu dili və ədəbiyyatı ilə yanaşı, Pakistanın tarixi, coğrafiyası, iqtisadiyyatı, mədəniyyəti və hüquq sistemi fənləri tədris olunur. İndiyə qədər isə urdu dilini 56 bakalavr və 4 magistr bitirib.

Rektor həmçinin BDU ilə Pakistanın ölkəmizdəki  səfirliyi arasında sıx münasibətlərin olmasını  qeyd edərək bir müddət öncə səfir İnayatullah Kakarla görüşünü xatırladıb. Səfirin universitetin urdu otağına 165 kitab, televizor, videomaqnitofon və kompüter hədiyyə etdiyini deyərək ona minnətdarlıq edib.

Daha sonra geniş tələbə auditoriyası qarşısında çıxış edən cənab Mir Can Camali Ermənistanın Azərbaycana təcavüzünü, ermənilərin Xocalıda törətdikləri soyqırımını qəti şəkildə pisləyib. Dağlıq Qarabağ və Kəşmir problemi arasında oxşar cəhətlərin çox olduğunu xatırladan sədr müavini insan amilinə hörmətin islam dininin  ən əsas hissəsini təşkil etdiyini deyib. Qonaq həmçinin Azərbaycanın gələcək nəslini təmsil edəcək gənclərin qarşısında çıxış etməsindən məmnun olduğunu bildirib və Azərbaycan xalqı ilə Pakistan xalqının eyni canda bir qəlb olduğunu xüsusilə vurğulayıb. Senatın Xarici Əlaqələr Komitəsinin sədri Səlim Seyfullah Xan isə hər iki ölkənin təcavüzün qurbanı olduğunu və dünya birliklərinin qəbul etdikləri qətnamələrin hələ də yerinə yetirilmədiyindən təəssüf hissi keçirdiyini bildirib.

Daha sonra çıxış edən Azərbaycan-Pakistan parlamentlərarası qrupun üzvü, millət vəkili Eldar İbrahimov iki ölkənin əlaqələrinin tarixindən bəhs edib.

Qonaqlar görüş çərçivəsində şərqşünaslıq fakültəsinin urdu dili ixtisası üzrə təhsil alan tələbələrlə də görüşüblər.  

BDU-nun Mətbuat və informasiya şöbəsi