Məlum olduğu kimi, Bakı Şəhəri üzrə Təhsil İdarəsinin müdiri Nailə Rzaquliyevanın müvafiq əmrinə əsasən fevral ayı paytaxtın orta ümumtəhsil məktəblərində Azərbaycan dili və ədəbiyyat fənni aylığı elan edilmişdir. Bu aylıq çərçivəsində Bakıdakı 164 nomrəli tam orta məktəbdə də silsilə tədbirlər keçirilib. Belə tədbirlərdən biri də Azərbaycan klassik ədəbiyyatının görkəmli nümayəndəsi olan Məhəmməd Füzulinin yaradıcılığına həsr olunmuş "Qəm karvanı və ya zülmətdə nur" adlı poeziya gecəsi idi. Məktəbin Azərbaycan dili və ədəbiyyat müəllimi Sahilə Allahverdiyevanın hazırladığı ssenari əsasında keçirilən tədbir VIII "a" sinif şagirdlərinin ifasında maraqla qarşılandı. Tədbirdə məktəbin müəllim-şagird kollektivi ilə yanaşı, BŞTİ-nin müdir müavini, professor Hüseyn Əsgərov, sektor müdiri Zəminə Əliqızı və digər qonaqlar iştirak edirdilər.

Poeziya axşamında böyük şairin həyat və yaradıcılığı ilə bağlı məlumatlar slaydlar vasitəsilə nümayiş etdirildi. Milli geyimlərdə səhnədə görünən şagirdlər şairin qəzəllərindən parçalar söylədilər. "Məni candan usandırdı" qəzəlinə bəstələnmiş "Şəbu-hicran" kantatası şagirdlərin ifasında səsləndirildi. Dahi şairin yaradıcılığının zirvəsi sayılan "Leyli və Məcnun" poemasına bəstələnmiş eyniadlı opera Musiqi Akademiyasının tələbələri tərəfindən səsləndi ki, bu da tədbirə rəng və ahəng qatdı.

Tədbirdə çıxış edən BŞTİ-nin müdir müavini, professor Hüseyn Əsgərov Füzuli lirikasının təqdimatında şagird və müəllim əməyini yüksək qiymətləndirdi. Dahi şairi tanımaq və sevməyin vətənə, ana torpağa məhəbbət hissi aşıladığını bildirən H.Əsgərov "Azərbaycan dilinin gücü və qüdrəti həm də Füzuliyə bağlıdır" mövzusuna şagirdlərin müraciət etməsini müsbət qiymətləndirdi.

Tədbirdə çıxış edən məktəbin direktoru Kəmalə Qədirli Azərbaycan dili və ədəbiyyat fənni aylığı çərçivəsində keçirilən tədbirlər planı haqqında məlumat verdi. Qeyd etdi ki, aylıq ərzində 16 sinifdə "acıq dərs"lər, "Ana dilim-Varlıq möhürüm" mövzusunda "dəyirmi masa", "Xocalı harayı" adlı tədbir keçirilmiş, divar qəzetləri, xüsusi bülletenlər buraxılmış, test və yoxlama yazı işləri vasitəsilə fənnin tədrisi vəziyyəti yoxlanılmışdır.  

Niyazi RƏHİMOV