Respublika Ekoloji Tərbiyə və Təcrübəçilik Mərkəzi tərəfindən məktəblilər arasında ekoloji maarifləndirməni gücləndirmək məqsədilə Nərimanov rayonu 34 nömrəli tam orta məktəbdə Ümumdünya "Su-Bataqlıq" və "Su Məməlilərinin Beynəlxalq Mühafizəsi" günü münasibətilə "Ekologiya və davamlı inkişaf" adlı tədbir keçirildi.

Akademik Həsən Əliyevin xatirəsinə həsr olunmuş  "Ekologiya və davamlı inkişaf" adlı ekoloji tədbirin əsas məqsədi məktəblilər arasında ekoloji biliklərin artırılması, ətraf mühitin qorunması, qlobal ekoloji problemlərin həlli yollarını şagirdlərə göstərməkdən ibarət idi. Məktəblilər arasında ekoloji təbliğatın gücləndirilməsi, şagirdlərdə təbiətə maraq, davamlı ekoloji inkişafın vacibliyi tədbirin əsas tərkib hissəsi idi. 

Bakıdakı 34 nömrəli tam orta məktəbin geniş və işıqlı zalında keçirilən tədbir 6 mərhələdən ibarət idi. Zalın ekoloji guşəsində Təhsil Nazirliyi RETTM-in təsis və dərc etdirdiyi "Ekoloji tərbiyə" qəzeti, ekoloji dərnək və tədris proqramları, bukletlər, jurnal və dərgilər, ekoloji nəşrlər nümayiş etdirildi.

Məktəbin direktoru Rəhman Hacıyev iştirakçıları salamlayaraq tədbirin məqsəd və məramını bildirdi. O, məktəblilərə təbiətlə düzgün ekoloji davranışdan, şagirdlər arasında ekoloji təhsilin vacibliyindən söz açdı.

Məktəbin "Ekoloji patrul" dəstəsi - nümunəvi təbiət keşikçiləri  tədbir iştirakçılarını salamladı. Dəstənin komandiri Zahid Əsgərli məruzə edərək həyata keçirdikləri ekoloji aksiyalar haqqında məlumat verdi.

"Floristika", "Bitkilər və ətraf mühit" dərnəyinin üzvləri öz maraqlı çıxışları ilə "Ağacların söhbəti", "Su-yağış-göy qurşağı" və "Təbiəti necə qoruyaq?!", "Azərbaycanın 7 təbiət gözəlliyi", "Meşələrin təbiətdə rolu", "Ekosistemlərdə ekoloji həyat",  "Meşənin sakinləri" adlı Azərbaycan və ingilis dillərində şeirlər söylədilər, ekoloji referatlarında  Azərbaycan təbiətinin biomüxtəlifliyindən bəhs etdilər. Respublikamızın 9 müxtəlif iqlim qurşağını özündə əks etdirən 7 müxtəlif ekosistemlərdən söz açdılar.

Dərnək üzvləri  "Azadlıq marşı", "Azərbaycan" və "Kəndimiz" adlı mahnıları ifa edərək ekoloji təhsillə yanaşı, musiqimizin də zənginliyini diqqət mərkəzinə çəkdilər. Daha sonra  "Meşədə konfrans  və yaxud ölüm və ya qalım" və "Təbiətin qüdrəti" adlı ekoloji səhnəciklərdə məktəblilər ekoloji problemlərə  toxunaraq Misir vagı, turac, qırqovul, şir, pələng və digər heyvanların məhvindən söz açdılar.  1950-ci  ildən etibarən planetimizdə ekoloji problemlərin yarandığından, bu problemin həlli yollarından bəhs edərək ekoloji dram tamaşasının məqsədini qonaqlara çatdırdılar.

Tədbirdə Təhsil Nazirliyinin Tərbiyə və məktəbdənkənar müəssisələr şöbəsinin müdiri Ağababa İbrahimov çıxış edərək ekoloji təhsillə bağlı məsələlərə toxundu, bu sahənin vacibliyindən söz açdı. Məktəblilərin ətraf mühitə sevgi ilə yanaşmalarında, ekoloji mövqelərinin formalaşmasında, ekoloji biliklərin dərindən mənimsənilməsində ekoloji məşğələlərin əvəzsiz rolu olduğunu bildirdi. O öz çıxışında vurğuladı ki, belə əhəmiyyətli tədbirlər məktəblilərdə ekoloji təhsilin gücləndirilməsilə yanaşı, yaddaşlarında da əlamətdar gün kimi qalacaqdır. A.İbrahimov ekoloji təhsilin prinsipləri, mahiyyəti və qanunlarından bəhs edərək dərnək üzvlərini ekologiya elmini sevməyə ruhlandırdı.

Sonra Azərbaycan Heyvanları Mühafizə Cəmiyyətinin sədri Azər Qarayev belə tədbirlərin tez-tez həyata keçirilməsini alqışlayaraq müasir dövrdə gənc nəslin ekoloji təhsili barədə söz açdı. Keçirilən tədbirdə meşə sakinlərinin - heyvanların problemlərinin məktəblilərin hazırladıqları ekoloji dram tamaşasında gündəmə gətirilməsini bəyəndiyini dedi.

Tədbirdə iştirak edən qonaqlar və məktəblilər arasında ekoloji diskussiyalar aparıldı. Dərnək üzvlərinin ekoloji bilik və bacarıqları sınaqdan keçirildi. Şagirdlərin fəallığı münsiflər heyəti tərəfindən alqışlandı. Məktəblilər ekoloji mövzularda söylədikləri şeir, hazırladıqları səhnəcik, referatlarla Ümumdünya "Su-Bataqlıq" və "Su Məməlilərinin Beynəlxalq Mühafizəsi" gününü qeyd etməklə yanaşı, akademik Həsən Əliyevin xatirəsini də yad etdilər. 

Tədbirdə Elnaz Sultanova, Nərmin Babayeva, Surac Əhmədli, Rauf Əliyev, Esmira Yusufova, Zahid Əsgərli, İlkin Əliyev, Rəna Ağayeva, Nigar  Dadaşova fəal iştirak etdiklərinə görə Təhsil Nazirliyi RETTM-in təsis etdiyi "Ekologiya və davamlı inkişaf" adlı diplomlara layiq görüldülər.

Sonda məktəblilərə hədiyyələr təqdim olundu.