Fevralın 23-də Bakıdakı 252 nömrəli məktəb-liseydə tarix müəllimi Nərgiz Qafarovanın iştirakı ilə VI sinifdə Atropatena dövlətinin yaranması mövzusunda "açıq dərs" keçirildi.

"Açıq dərs"də məktəb-liseyin direktoru Abbasqulu Quliyev, tədris işləri üzrə direktor müavini Şərqiyə Əkbərova, tarix fənni üzrə metodikbirləşmə rəhbəri Qəndab Həbibova və digər şəxslər iştirak edirdilər.

Tədbiri giriş sözü ilə açan məktəb-liseyin direktoru Abbasqulu Quliyev "açıq dərs"lərin əhəmiyyətindən danışdı. Şagirdlərə tarix fənninə xüsusi maraq göstərilməsinin vacibliyini qeyd edən A.Quliyev "keçmişini bilməyənin gələcəyi olmaz" fikrini söylədi. Belə dərslərin həm müəllimlərə, həm də şagirdlərə müsbət təsir etdiyini bildirdi.

N.Qafarova dərs prosesində şagirdləri "Azərgünasp", "Sak" və "Qazaka"  komandalarına bölməklə onların  fəallığını təmin edərək keçdiyi mövzuya  dair əyani vəsaitlərdən istifadə etməklə  fənlərarası inteqrasiya yaratdı. Slayd və videoçarxlardan istifadə olundu. Dərs prosesində şagirdlərə müstəqil fikir söyləmək imkanı yaradan müəllim, sual-cavab və test üsulu ilə şagirdlərin cavablarını qiymətləndirdi. Sinfin şagirdlərindən Fərid Məmmədovun ifasında Atropatena dövlətinin hökmdarı Atropat canlandırıldı ki, bu da iştirakçılara xoş təsir göstərdi.

Sonra "açıq dərs"in müzakirəsi aparıldı. Dərsin  müasir tələblər səviyyəsində qurulması, interaktiv təlim üsullarından, resurslardan geniş istifadə edilməsi iştirakçılar tərəfindən yüksək qiymətləndirildi, bir sıra tövsiyələr verildi. 

Niyazi RƏHİMOV