Fevralın 17-də Bakıdakı 258 nömrəli tam orta məktəbin akt zalında torpaqlarımızın azadlığı, bütövlüyü uğrunda gedən döyüşlərdə qəhrəmancasına şəhid olmuş Arif Əkbər oğlu Vəliyevin anım günü keçirildi. Əvvəlcə Dövlət himni ifa olundu və  əsgər paltarı geyinmiş  şagirdlər "Əsgər marşı"nın sədaları altında üçrəngli Dövlət bayrağımızı səhnəyə gətirdilər. Düşmənlə mübarizədə şəhid olmuş vətən övladlarının əziz xatirəsi bir dəqiqəlik sükutla yad edildi.

Məktəbin müəllim və şagird kollektivinin, millət vəkillərinin, Nərimanov Rayon İcra Hakimiyyəti rəhbər işçilərinin, ictimai birliklərin, KİV nümayəndələrinin iştirakı ilə keçirilmiş tədbiri məktəbin direktor müavini Samirə Mehdiyeva açaraq qəhrəmanlıq və şəhidlik zirvəsinə gedən yol haqqında iştirakçılara məlumat verdi. O, Arifin şücaətindən və qəhrəmanlığından danışdı.

Tədbirdə çıxış edən məktəbin direktoru Sədaqət Hüseynova Arif Vəliyevin həyat və keçdiyi döyüş yolundan söz açdı.

Arif  qızğın döyüşlərin birində əvvəl ayağından və qolundan yaralanmışdır. Lakin buna baxmayaraq o şəhid olmuş döyüşçü yoldaşlarının cəsədini təhlükəli yerlərdən uzaqlaşdırmışdır. İgid və qorxmaz vətən oğlu  yaralı vəziyyətdə komandirinin yaralandığını görüb onu düşmən hədəfindən xilas edərkən özü düşmən gülləsinə tuş gələrək qəhrəmancasına həlak olmuşdur. 

Tədbirdə millət vəkili Adil Əliyev, Nərimanov Rayon İcra Hakimiyyəti başçısının müavini İlqar Mirzəyev və digər qonaqlar çıxış edərək dövlətimizin dünyada nüfuzunun artmasından, ordumuzun güclənməsindən, böyüməkdə olan vətənpərvər övladların vətən sevgisindən danışdılar. Onlar təhsil ocaqlarında belə tədbirlərin keçirilməsini müsbət qiymətləndirdilər.

Şagirdlər Arif Vəliyevin xatirəsinə həsr etdikləri şeirlərlə, mahnılarla, göstərdikləri sənəciklərlə həmin günü yaddaqalan etdilər. Sonra hərbi geyimdə dayanmış XI sinif şagirdləri Azərbaycan bayrağını dalğalandıraraq məktəbin adını həmişə uca tutacaqlarını, "yaxşı" və "əla" qiymətlərlə oxumaqla Arif Vəliyev kimi mətin, mübariz və qorxmaz olacaqlarını bildirdilər.

Sonda Arif Vəliyevin anası Sona xanım tədbir iştirakçılarına təşəkkürünü bildirdi.  

Rəşad ZİYADOV