Azərbaycan Müəllimlər İnstitutu Salyan filialının "Müasir təlim metodları və dayaq məntəqələri ilə iş" kabinetinin müdirindən aldığımız məlumatda bildirilir ki, bu günlərdə Neftçala şəhər 1 nömrəli tam orta məktəbdə dayaq məntəqə sədrləri, qabaqcıl müəllimlər, filialın və rayon təhsil şöbəsinin metodistlərinin iştirakı ilə seminar-müşavirə keçirilib.

Seminar-müşavirəni rayon təhsil şöbəsinin metodkabinet müdiri Şirməmməd Əliyev açaraq təhsil nazirinin əmrinə müvafiq olaraq yaradılan dayaq məntəqələrinin fəaliyyəti barədə məlumat verib. Qeyd edib ki, fənlər üzrə dayaq məntəqələri qabaqcıl təhsil müəssisələrində yaradılmış və təcrübəli, "öyrədənləri öyrədən" kurslarını bitirmiş müəllimlər məntəqə sədrləri təyin ediliblər. Neftçala rayonu üzrə təhsil müəssisələrində 37 dayaq məntəqəsi yaradılıb.

AMİ-nin Salyan filialının "Müasir təlim metodları və dayaq məntəqələri ilə iş" kabinetinin müdiri Sahib Həsənov geniş məruzə edib. Qeyd edib ki, pedaqoji kadrların ixtisasartırma təhsili və müəllimlərin təkmilləşdirilməsi ən vacib məsələ kimi qarşıda durur. Dayaq məntəqələrində müəllimlər pedaqoji innovasiyalar, yeni təlim texnologiyaları barədə vaxtında məlumatlar əldə edir və praktiki fəaliyyətlərində onu həyata keçirirlər.

Seminar-müşavirədə dayaq məntəqə sədrlərinə metodiki vəsait və təlimati sənədlər paylanılıb. 

ƏDALƏT