Bu günlərdə Türkiyənin Ərzurum Atatürk Universitetində 26 ölkənin 70 elmi qurumundan 150 alimin iştirakı ilə "Biomüxtəliflik, idman, turizm və qlobal dəyişikliklər" mövzularında konfrans keçirilmişdir. "ESRUC" Avrasiya İpək yolu Universitetləri Konsorsiumu çərçivəsində təşkil olunmuş konfransda naxçıvanlı elm adamları da iştirak etmişdir.

Geniş coğrafiyanı əhatə edən konfransda ABŞ, İngiltərə, Malayziya, Monqolustan, Yəmən, Hindistan kimi ölkələrin alimlərinin çıxışları maraqla qarşılanmışdır. Bu böyük elmi tədbirdə Naxçıvan Dövlət Universitetini təmsil edən tərbiyə işləri üzrə prorektor, fəlsəfə elmləri doktoru, professor Məmməd Rzayev, sosial idarəetmə və turizm kafedrasının baş müəllimi, iqtisadiyyat üzrə fəlsəfə doktoru Əli Cabbarov, Naxçıvan Özəl Universitetini təmsil edən İsrafil Babayev turizm və qlobal dəyişikliklər barədə məruzələrlə çıxış etmişlər. Naxçıvan Muxtar Respublikasının turizm ehtiyatlarını, sosial-iqtisadi inkişafını əks etdirən slaydlar nümayiş etdirilmişdir.

Konfransın yekununda azərbaycanlı nümayəndələrin birgə təşkilatçılığı ilə iştirakçılara Xocalı soyqırımı haqqında slaydlarla geniş məlumat çatdırılmış, soyqırımı qurbanlarının xatirəsi bir dəqiqəlik sükutla yad edilmişdir.  

Çinarə MƏMMƏDOVA,
NDU-nun Media mərkəzinin əməkdaşı