Azərbaycan müəllimləri üçün korporativ elektron poçt xidmətində qeydiyyatdan keçmiş müəllimlərin sayı 2 min nəfərə çatmışdır. Müəllimlər elektron poçtu ilə (ad, soyad@teacher.edu.az) Təhsil Nazirliyi, "Microsoft Azərbaycan" şirkəti və "Mədəd-Azərbaycan" təşkilatının  birgə fəaliyyəti sayəsində "2008-2012-ci illərdə Azərbaycan Respublikasının təhsil sisteminin informasiyalaşdırılması üzrə Dövlət Proqramı" çərçivəsində təchiz olunublar.

"Microsoft Azərbaycan" şirkətinin dəstəyi ilə həyata keçirilən layihə çərçivəsində müəllimlərin poçt ünvanları teacher.edu.az domeni adı altında açılmışdır. Elektron poçt ünvanları Microsoft Live@Edu texnologi platformasının bazasında işləyir.

"Microsoft Azərbaycan" şirkətinin "Təhsildə əməkdaşlıq" proqramının meneceri Emin Axundovun sözlərinə görə, elektron poçtu ilə Dövlət Proqramı çərçivəsində təlimlərdən keçmiş, həmçinin "Elektron məktəb" layihəsinə qoşulmuş pilot məktəblərin müəllimləri təchiz edilir. Bu təşəbbüsün əsas məqsədi müəllimlər arasında İnternet vasitəsilə münasibətlərin dərinləşməsi və peşəkar informasiya mübadilələrinin yeni mərhələyə çatdırılmasıdır. Bununla yanaşı, təhsil işçilərinin rəsmi e-poçt ünvanları ilə təchizatı təhsil sistemində elektron idarəetmənin və sənəd dövriyyəsinin tətbiqinə zəmin yaradan amillərdən biridir. 

Hicran ƏKBƏROVA