Bakının Balaxanı qəsəbəsində yerləşən  69 nömrəli tam orta məktəbdə "Yeni fənn kurikulumlarının tətbiqi, təhsilin keyfiyyəti, ibtidai siniflərdə kurikulum sisteminin həyata keçirilməsinin vəziyyəti" mövzusunda  elmi-praktik konfrans keçirildi. Konfransda məktəbin müəllim, şagird kollektivi ilə yanaşı, Bakı Şəhəri üzrə Təhsil İdarəsindən, Sabunçu Rayon İcra Hakimiyyətindən nümayəndələr, məktəb direktorları, valideynlər  və digər qonaqlar iştirak edirdilər.

Əvvəlcə  qonaqlar məktəbin foyesində açılmış şagirdlərin əl işlərindən ibarət rəsm sərgisi ilə tanış oldular. Konfransı giriş sözü ilə açan təhsil ocağının direktoru Xalıqverdi Abbasov şagirdlərin istedadının inkişaf etdirilməsi üçün məktəbdə hər cür şəraitin yaradıldığını dedi.  Direktor təhsil ocağında təlimin keyfiyyətini yüksəltmək məqsədilə  görülən işlər, yeni kurikulumların tətbiqi vəziyyəti barədə məlumat verdi.  Bildirdi ki, müasir təlim metodlarından  istifadə sahəsində qazanılmış təcrübəni nümayiş etdirmək üçün tez-tez "açıq dərs"lər  keçirilir. 

Konfrans çərçivəsində  iştirakçılara ibtidai siniflərdə təşkil olunan  "açıq dərs"lər barədə məlumat verildi.  Qonaqlar həmin dərslərdə iştirak etməyə dəvət edildilər.

Məktəbin  I, II, III siniflərində keçilən "açıq dərs"lər dinlənildikdən sonra onların müzakirəsi aparıldı. 

Müzakirələrdə çıxış edənlər  dinlədikləri dərslərin kurikulumun tələblərinə uyğun keçdiyini, müasir təlim metodlarından, resurslardan  geniş istifadə olunduğunu bildirdilər. Təhsil ocağında bu sahədə görülən işlər yüksək qiymətləndirilərək müəllimlərə bəzi təklif və tövsiyələr verildi.  

Rəşad ZİYADOV