Bu gün Azərbaycanın ucqar rayon və kəndlərində də müasir standartlara cavab verən təhsil ocaqları fəaliyyət göstərir. Belə məktəblərdən biri də rəhbərlik etdiyim Qusar rayonunun Cibir kənd tam orta məktəbidir. Cari dərs ilində məktəbdə 183 şagird təhsil alır. Onların təlim-tərbiyəsi ilə 27 nəfər müəllim məşğuldur. Kollektivimiz müasir məktəbin qarşısında duran, cəmiyyətimiz üçün sağlam düşüncəli, yüksək biliyə, möhkəm əqidəyə malik gənc nəsil yetişdirmək vəzifəsini şərəflə həyata keçirir. Məktəb fəaliyyətinin əsas göstəricilərindən biri məzunların ali məktəblərə qəbuludur. Son illər məktəbimizin bu sahədə göstəriciləri yüksələn xətlə gedir. Belə ki, əgər 2010-cu ildə məzunlarımızdan 3 nəfər respublikamızın, 2 nəfəri isə Rusiyanın ali məktəblərinə qəbul olunmuşdusa, 2011-ci ildə 11 məzundan 6 nəfəri ali məktəblərə, 1 nəfər isə kollecə  qəbul  olunub.  Əgər Cibir kəndinin kiçik bir yaşayış məskəni olaraq ucqar bir ərazidə yerləşməsinə nəzər salsaq, bu uğurların təqdirəlayiq və  inkişafa  hesablanmış  islahatların  nəticəsi  olduğunu başa düşmək olar. Belə müvəffəqiyyətlərin əldə olunmasının səbəbi məktəbdaxili nəzarətin düzgün qurulması, məktəbdə dərs prosesinin səmərəli təşkili, müəllimlərin dərsə hazırlıqlı gəlməsi və şagirdlərlə aparılan məqsədyönlü   təlim-tərbiyə   işinin   nəticəsidir.

Məktəbdə şagirdlərə vətənpərvərlik hissinin aşılanması sahəsində müntəzəm işlər aparılır. İbtidai siniflərdən başlayaraq şagirdlərə dövlətimiz, dövlət rəmzlərimiz, milli qəhrəmanlarımız, tarixi abidələrimiz, təbii sərvətlərimiz, ordumuz, xalqımızın qatı və məkrli düşməni olan ermənilərin ölkəmizdə törətdikləri faciə və vəhşiliklər barədə geniş məlumatlar verilir.

Qeyd edək ki, məktəbdə öz ixtisasını yaxşı bilən, təhsilin səviyyəsinin yüksəlməsi qayğısına qalan müəllimlər çoxdur. Məktəbin bütün müəllimləri İKT üzrə təlim kurslarından keçməklə sertifikatlar almışlar. Məktəbdə valideynlərlə sıx əlaqə yaranıb. Hər bir müəllim başa düşür ki, o, şagirdlərlə yanaşı, həm də valideynlərin qarşısında cavabdehdir. Bu isə müəllimlərin məsuliyyətini artırır, onları öz üzərində daha yaxşı işləməyə sövq edir. Məktəbdə fəaliyyət göstərən informatika kabinetində şagirdlər nəzəri və praktiki biliklərə yiyələnirlər. Kabinetdəki 6 kompüter və bir ədəd  noutbuk müəllim və şagirdlərin ixtiyarındadır.    

Dair MƏCİDOV,
Qusar rayon Cibir kənd
tam orta məktəbinin direktoru