Türkiyənin Şanlıurfa vilayətində yerləşən kolleclərdən birinin rəhbərliyi qış məktəbi proqramı təşkil etməklə şagirdlər arasında ingilis dilinin tədrisinin təkmilləşdirilməsi istiqamətində fəal iş aparır. Bu məqsədlə Azərbaycandan və Kanadadan müəllimlər dəvət olunmuşlar.

AzərTAc Türkiyə KİV-lərinə istinadla xəbər verir ki, qış məktəbi proqramı çərçivəsində Bakı Britaniya Məktəbindən dəvət edilən Vəfa Musayeva və Kanadanın Toronto şəhərinin "Peel District School Board" məktəbindən Fatimə Əhməd ingilis dilini tədris etmişlər. 1-ci və 6-cı sinif şagirdlərinin iştirak etdikləri və altı gün davam edən qış məktəbində uşaqlar ingilis dilində praktiki təcrübələrə yiyələnmişlər. Şagirdlərin ingilis dilini öyrənməyə çox həvəsli olduğunu deyən müəllimlər onların sözləri tələffüz etməkdə çətinlik çəkdiklərini, lakin əzbərləmə qabiliyyətlərinin yaxşı olduğunu demişlər.

Kollecin rəhbəri gələcəkdə yaz məktəbi də təşkil etməyi planlaşdırdıqlarını bildirmişdir.