Yanvarın 24-də Sumqayıt Özəl Türk Liseyində görkəmli alim, akademik Həsən Əlirza oğlu Əliyevin əziz xatirəsinə həsr olunmuş "Yer kürəsini tanıyaq, qoruyaq və sevək" mövzusunda sərgi-seminar keçirilib. Tədbirdə liseyin 7-ci sinif şagirdləri slayd, sərgi və maket kateqoriyalarında müxtəlif mövzulara həsr olunmuş fərdi işlərini nümayiş etdiriblər. Liseyin coğrafiya müəllimi Namiq Ağaməmmədov tədbir iştirakçılarına sərgi-seminarın keçirilməsinin əhəmiyyəti və məqsədi barəsində geniş məlumat verib. 

Sərgi-seminar şagird və müəllimlər tərəfindən böyük maraqla izlənilib. Bəzi şagirdlərin öz işlərini ingilis dilində təqdim etməsi xüsusi ilə təqdirəlayiq hal kimi qiymətləndirilib. Tədbirdə Sumqayıt Şəhər Təhsil Şöbəsi metodkabinetinin müdiri Sabir Məmmədov və Sumqayıt Şəhər Gənclər və İdman Baş İdarəsinin rəisi Musa Həsənov, eləcə də  ictimaiyyət nümayəndələri və valideynlər iştirak ediblər. Çıxış edənlər belə tədbirlərin keçirilməsinin şagirdlərin intellektual səviyyələrinin artırılmasında, onlarda özünə inamın aşılanmasında əhəmiyyətli rol oynadığını bildiriblər. Qeyd edilib ki, belə tədbirlərin silsilə şəklində liseydə keçirilməsi burada təlim-tərbiyənin yüksək səviyyədə təşkil olunduğunu bir daha sübut edir. Şagirdlərin əl işlərinin orjinallığı, öz fikirlərini sərbəst şəkildə sərgi iştirakçılarına çatdıra bilmələri isə təqdirəlayiqdir.    

Şakir CƏFƏROV