Türkiyə Cümhuriyyətinin dövlət və akademik qurumlarının nəşriyyatları tərəfindən çap olunmuş kitablar dəsti Naxçıvan Dövlət Universitetinin kitabxanasına və universitetdəki Atatürk Mərkəzinə hədiyyə edilmişdir. Bu kitablar arasında ensiklopedik nəşrlər üstünlük təşkil edir. Türk dünyası ədəbiyyatları, ədəbiyyatçıları ensiklopediyası, Ədəbiyyat mətnləri antologiyası, Türk dünyası ədəbiyyat və mədəniyyət xadimləri ensiklopediyası, İstanbul ensiklopediyası kimi nəşrlər zəngin informasiya bazası olan əhəmiyyətli kitablardır. Məşhur  səyyah Övliya Çələbinin "Səyahətnamə" əsərinin səkkiz cildliyi, Dədə Qorqud dastanlarına, Kudatku bilik abidəsinə həsr edilmiş kitablar nadir nəşrlər seriyasına daxildir.

Təqdim olunan kitablar arasında Azərbaycana aid nəşrlər də mühüm yer tutur. Türkiyə Cümhuriyyəti Başbakanlıq Dövlət Arxivlər Baş İdarəsinin 2011-ci ildə çap etdirdiyi "Osmanlı arxiv bəlgələrində Naxçıvan" kitabı Naxçıvan tarixini öyrənmək istəyənlər üçün faydalı mənbədir. Bundan başqa, Azərbaycan şeir və hekayə antologiyaları, xalq yazıçısı Anar haqqında monoqrafiya, görkəmli ədəbiyyatşünas Yaşar Qarayevin "Azərbaycan ədəbiyyatına dair tədqiqlər" əsəri və sair kitablarda milli ədəbiyyatımızın və mədəniyyətimizin tarixi ənənələri öz əksini tapmışdır.

Naxçıvan Dövlət Universitetinə hədiyyə olunmuş kitablardan lüğətlər və turizm üzrə tanıtma kitabları da müəllimlər və tələbələr üçün maraqlı olacaqdır.

Kitabları Naxçıvan Dövlət Universitetinə Türkiyə Cümhuriyyətinin Naxçıvandakı Baş konsulu Denk Ünal təqdim etmişdir.  

Mehriban SULTAN