Yanvarın 30-da Təhsil Nazirliyində görkəmli Azərbaycan yazıçısı Mirzə İbrahimovun 100 illik yubileyi ilə əlaqədar respublikanın ümumtəhsil məktəb şagirdləri arasında keçirilmiş inşa yazı müsabiqəsi qaliblərinin mükafatlandırılması mərasimi oldu.

Təhsil Nazirliyinin Aparat rəhbəri və şöbə müdirlərinin M.İbrahimovun ailə üzvlərinin, qaliblərin və onların təmsil etdikləri məktəblərin nümayəndələrinin iştirak etdikləri mərasimi Azərbaycan Respublikasının təhsil naziri Misir Mərdanov açaraq zala toplaşanları salamladı, çox vacib bir tədbirə yığışdıqlarını bildirdi. Nazir xatırlatdı ki, ötən il Azərbaycan Respublikasının Prezidenti cənab İlham Əliyev Azərbaycanın böyük oğlu, görkəmli dövlət xadimi, yazıçı, alim və ictimai xadim Mirzə İbrahimovun anadan olmasının 100 illik yubileyinin keçirilməsi haqqında sərəncam imzalamışdır. Həmin sərəncama əsasən ölkəmizdə silsilə tədbirlər təşkil olunmuşdur. Sərəncamın icrası ilə bağlı Təhsil Nazirliyinin 08.08.2011-ci il tarixli 1442 nömrəli əmri ilə təsdiq edilmiş "Tədbirlər Planı"na uyğun olaraq Mirzə İbrahimovun 100 illiyi ilə bağlı ümumtəhsil məktəblərinin şagirdləri arasında inşa yazı müsabiqəsi keçirilmişdir.

Təhsil naziri diqqətə çatdırdı ki, məktəb çərçivəsində, rayon, şəhər səviyyəsində keçirilmiş müsabiqənin iştirakçısı olan şagirdlər Mirzə İbrahimovu necə tanıdıqlarını ən sadə, ən səmimi fikirlərlə ifadə etmişlər. Müsabiqənin rayon, şəhər mərhələsinin yekunu olaraq Təhsil Nazirliyinə 115 inşa yazı təqdim olunmuş və həmin yazılar burada ekspertlər tərəfindən qiymətləndirilmişdir. Qiymətləndirmənin nəticələrinə əsasən 7 nəfər I dərəcəli, 14 nəfər II dərəcəli, 16 nəfər isə III dərəcəli diplomlara layiq görülmüş, qaliblər Təhsil Nazirliyinin 16 yanvar 2012-ci il tarixli əmri ilə mükafatlandırılmışlar.

Müsabiqənin qalibləri sırasında respublikamızın bütün bölgələrindən şagirdlərin olduğunu diqqətəlayiq hal kimi dəyərləndirən təhsil naziri bunu ölkəmizin hər yerində Mirzə İbrahimovun yaxşı tanınması, onun adının məktəblilərin, müəllimlərin qəlbində daim yaşaması ilə əlaqələndirdi, Mirzə müəllimin xatirəsinin əbədiləşdirilməsi, onun 100 illik yubileyinin respublikada geniş qeyd olunması üçün xüsusi sərəncam imzalamış ölkə Prezidentinə təhsil işçiləri adından minnətdarlığını bildirdi.

Təhsil naziri Misir Mərdanov çıxışında Mirzə İbrahimovun vətənimiz, xalqımız qarşısındakı böyük xidmətlərindən söz açaraq bildirdi ki, geniş ictimaiyyət, xüsusən də indiki nəsil Mirzə İbrahimovu görkəmli yazıçı kimi tanıyır. Bu gün Azərbaycan məktəbliləri onun əsərləri ilə dərsliklərdən tanış ola bilirlər. Ancaq ictimaiyyətimiz onu da bilir ki, Mirzə İbrahimov təkcə böyük yazıçı, dramaturq deyil, eyni zamanda görkəmli dövlət adamı, ictimai xadim olub. O, müxtəlif illərdə Azərbaycan SSR Ali Soveti Rəyasət Heyətinin sədri, Azərbaycan Yazıçılar İttifaqı İdarə Heyətinin sədri və birinci katibi, Asiya və Afrika ölkələri ilə Sovet Həmrəylik Komitəsinin sədri vəzifələrində işləyib, uzun illər SSRİ Ali Sovetinin, Azərbaycan SSR Ali Sovetinin deputatı olub. Nazir bir diqqətçəkən faktı da nəzərə çatdıraraq qeyd etdi ki 1945-ci ildə Azərbaycan Milli Elmlər Akademiyası təsis olunduqda o vaxt 34 yaşı olan Mirzə İbrahimov akademiyanın ilk seçilən 15 həqiqi üzvündən biri olub, 1942-ci ildə isə 31 yaşında ikən Azərbaycan Xalq Maarif Komissarı vəzifəsinə təyin olunub və 5 il bu vəzifədə çalışıb.

Misir Mərdanov Mirzə İbrahimovun 1954-1958-ci illərdə Azərbaycan SSR Ali Soveti Rəyasət Heyətinin sədri işləyərkən Azərbaycan dilinin dövlət dili kimi statusunun bərqərar olmasında xidmətlərindən də söz açaraq həmin xidmətlərin indi də xalqımız tərəfindən minnətdarlıqla xatırlandığını bildirdi.

Təhsil naziri çıxışının sonunda inşa yazı müsabiqəsinin qaliblərini təbrik edib onun keçirilməsində əməyi olan hər kəsə, xüsusən də Təhsil Nazirliyinin bu işdə daha çox zəhmət payı olan əməkdaşlarına təşəkkür etdi.

Sonra müsabiqə qaliblərinə layiq görüldükləri diplomlar və hədiyyə olaraq Mirzə İbrahimov haqqında kitab təqdim edildi.

Mərasimdə çıxış edən Mirzə İbrahimovun  qızı, tanınmış bəstəkar, Azərbaycanın xalq artisti Sevda İbrahimova atasının xatirəsinə göstərilən ehtirama görə Azərbaycan Prezidenti İlham Əliyevə minnətdarlığını bildirdi, atası ilə bağlı bəzi xatirələrini bölüşdü. 

Yusif ƏLİYEV