Görkəmli rəssam, istedadlı fırça ustası Bəhruz Kəngərlinin anadan olmasının 120 illiyi tamam olur. Bununla əlaqədar Naxçıvan Muxtar Respublikası Ali Məclisinin sədri tanınmış rəssamın yubileyinin keçirilməsi ilə bağlı sərəncam imzalamışdır.

Həmin sərəncama müvafiq olaraq Naxçıvan Müəllimlər İnstitutunda elmi-praktik konfrans keçirilmişdir. Konfransda institutun humanitar və təsviri incəsənət kafedrasının baş müəllimi, sənətşünas Nizami Alıyev, pedaqogika üzrə fəlsəfə doktoru Mahir Xəlilov, təbiət və incəsənət fakültəsinin dekan müavini Turə Dünyamalıyeva çıxış etmişlər. Bildirilmişdir ki, parlaq istedada, yaradıcılıq qabiliyyətinə malik olan Bəhruz Kəngərli Azərbaycan realist rəssamlığının əsasını qoyan təsviri incəsənət tariximizdə adı qızıl hərflərlə həkk olunan istedad sahiblərindəndir. O, 1892-ci ilin yanvar ayında Naxçıvanda dünyaya göz açıb. İlk təhsilini doğma şəhərdə, sonra isə Tiflisdə xüsusi rəssamlıq məktəbində alıb. B.Kəngərli rus boyakarlıq məktəbinin ənənələrindən bəhrələnsə də, əsərlərini tamamilə milli ruhda yaratmışdır. İncəsənətimizdə realist dəzgah boyakarlığının təşəkkülü, mənzərə və portretin müstəqil janr kimi formalaşması da məhz onun adı ilə bağlıdır. Rəssamın yaradıcılığında mənzərə janrı mühüm yer tutur. Naxçıvan gözəlliklərinin və tarixi abidələrinin təsviri ilə bağlı rəssamın bir sıra əsərləri var. "İlanlı dağ", "Ay işığında", "Günəş batarkən", "Ağrı dağı", "Köhnə qala", "Əliabad kəndində darvaza", "Yamxana kəndinə gedən yol", "Möminə Xatın", "Nuhun qəbri" və digər əsərləri bənzərsiz sənət nümunələrindəndir.

Konfransda vurğulanmışdır ki,  7 il yaradıcılıq fəaliyyəti ilə məşğul olan Bəhruz Kəngərli 2000-ə qədər rəsm əsəri yaratmışdır. O, realist fəaliyyəti, yüksək bədii-estetik dəyəri ilə diqqəti cəlb edən saysız portret, natürmort  müəllifidir. O, rənglərin ahəngindən, cizgilərin formalarından məharətlə istifadə edərək son dərəcə bənzərsiz əsərlər yaratmışdır. Bir qərinəlik ömründə əbədiyaşar əsərlərə həyat verən, incəsənət tariximizin unudulmayan nümayəndəsinə çevrilən Bəhruz Kəngərli hər zaman müasirimiz olaraq bizimlə gələcəyə addımlayır. Onun rənglər dünyası özünün sirli-sehrli pərdəsini saxlamaqdadır.

Sonda tələbələri maraqlandıran suallar cavablandırılmışdır. 

Naxçıvan Müəllimlər İnstitutunun Mətbuat xidməti