Ədəbiyyatşünas-tənqidçi, fəlsəfə doktoru Füzuli Əsgərlinin "Sehrli dünyanın memarı" (Bakı. ADPU nəşriyyatı, 2012, 444 səhifə) adlı monoqrafiyası sevimli uşaq yazıçısı Zahid Xəlilin 70 illik yubileyinə həsr edilib. Müəllif bu monoqrafiyasında yazıçının ədəbi yaradıcılığını - poeziya, nəsr və dramaturgiyasını geniş təhlil edib. Tanınmış yazıçının yaradıcılığını elmi-nəzəri aspektdə araşdıran müəllif, tədqiq etdiyi müxtəlif janrlı əsərlərin ideya-bədii və sənətkarlıq xüsusiyyətlərinin açılmasına xüsusi diqqət yetirib. Bu bitkin monoqrafiyada yazıçının şeiriyyatının musiqi ilə bağlılığı, qarşılıqlı ədəbi əlaqələr və tərcümə prosesindəki fəaliyyəti, Azərbaycan və rus ədəbi tənqidinin Zahid Xəlil yaradıcılığına olan münasibəti hərtərəfli işıqlandırılıb.

Elmi redaktoru akademik Bəkir Nəbiyev, rəyçiləri filologiya elmləri doktorları, professorlar Nizami Cəfərov və Rafiq Yusifoğlu olan "Sehrli dünyanın memarı" monoqrafiyası səkkiz fəsildən ibarətdir və hər bir dolğun fəsildə Zahid Xəlilin tədqiq olunmuş müxtəlif janrlı zəngin yaradıcılığı - poeziya, nəsr, dramaturgiya və həmçinin digər ədəbi sahələr özünün geniş əksini tapıb.

Bu dəyərli monoqrafiyanın ilk səhifəsi filologiya elmləri doktoru, professor Himalay Qasımovun "Bitkin elmi-tədqiqat əsəri" adlı yazısı ilə açılır. O bu məqaləsində yazır: "Zahid Xəlil şeirlərindəki təbiilik, uşaq qəlbinə və körpə dünyasına bələdlik, səmimi hisslər daha qabarıqdır, müəllifin incə, həssas müşahidələrinin poetik ifadəsidir. Fərəh doğuran hal budur ki, şair uşaqlara məxsus saflığı, şirinliyi, gəncliyə məxsus enerjini və həvəsi öz içində və yaradıcılığında daim qoruyub saxlaya bilmişdir. Şairin bu gün də eşidilən gur səsi, təravətli nəfəsi bizə bu qənaətə gəlməyə tam haqq verir".

Eyni zamanda Himalay müəllim monoqrafiyanın "Uşaqları söz sehrinə salan şair", "Həm də böyüklərin həmdəmi", "Uşaq poeziyası musiqi qanadlarında", "Milli uşaq nəsrində ilk macəra roman janrı", "Uşaq dramaturgiyasının inkişafında fəaliyyəti", "Qarşılıqlı ədəbi əlaqələrin, bədii tərcümənin inkişafında rolu" və "Azərbaycan - rus ədəbi tənqidi Zahid Xəlil yaradıcılığı haqqında" adlı hər bir fəslini ətraflı təhlil edib...

Bütün bunlarla bərabər monoqrafiya ilə tanış olan hər bir oxucu Zahid Xəlilin indiki Bakı Dövlət Universitetinin jurnalistika fakültəsini bitirdiyi, həyatını bütövlükdə uşaq ədəbiyyatına həsr etdiyi, onun "Uçan çıraqlar", "Qarışqalar", "Mən rəngləri tanıyıram", "Göydən üç alma düşdü", "Quşlar, quşlar", "Torağaylar oxuyur", "Ballıca", "Çıraq nənənin nağılları", "Cırtdanla Azmanın yeni macəraları", "Mavi dəniz üzərində", "Odlar yurdunun paytaxtı", "Dünyanın ən balaca nağılları" adlı kitablarının müxtəlif yaşlı uşaqların, o cümlədən gənclərin təlim-tərbiyəsində, bədii-estetik zövqünün formalaşmasında, bilik dairəsinin daha əhatəli şəkildə genişlənməsində, mənəvi-əxlaqi dəyərlərin bütövləşməsində mühüm rol oynadığı, Zahid Xəlilin 1970-ci ildən Azərbaycan Dövlət Pedaqoji Universitetinin auditoriyalarında tələbələrə mühazirələr oxuduğu, filologiya elmləri doktoru olduğu və s. barədə ətraflı məlumat ala bilər. Eyni zamanda Zahid Xəlilin ədəbi yaradıcılığı dünya xalqlarının bir çox dillərinə - rus, Belarus, Litva, latış, eston, moldav, Ukrayna, gürcü, özbək, qazax, türkmən, eləcə də alman, fin, yuqoslav, holland, hind və s. dillərə tərcümə olunaraq çoxmillətli oxucular arasında daha geniş miqyasda tanındığı haqda da dəyərli məlumatlar əldə edə bilərlər.

İnanırıq ki, ədəbiyyatşünas alim Füzuli Əsgərlinin geniş oxucu kütləsi üçün nəzərdə tutulan bu kitabının məziyyətlərini onu oxuyub bəhrələnənlər daha aydın görəcəklər. 

Ədalət DAŞDƏMİRLİ