Azərbaycanın ali təhsil sistemi ilə bağlı yeni layihə hazırlanır. Layihədə ali təhsil sistemində maliyyələşdirmə komponentinə uyğun olaraq, universitetlərə qrantların verilməsi nəzərdə tutulur. Dünya Bankı (DB) Azərbaycanın ali təhsil sistemi ilə bağlı yeni beşillik layihə hazırlayır.

Təhsil Nazirliyində "Azərbaycanın təhsil sektorunun inkişafı layihəsi"nin əlaqələndirmə qrupunun rəhbəri Elvin Rüstəmov AzərTAc-a bildirmişdir ki, "Azərbaycan ali təhsil sistemində islahatlar layihəsi"nin üç əsas komponenti var. Həmin komponentlər ali təhsilin keyfiyyətinin təminatı, ali təhsil sistemində maliyyələşdirmə, ali təhsildə tənzimlənmə və idarəetmədir.

E.Rüstəmov vurğulamışdır ki, ali məktəblərə qrantların verilməsi bir universitetdə yeganə olan ixtisasın digər ali məktəblərdə də açılması üçün işlərin görülməsinə imkan verəcəkdir. İstənilən ali məktəb yeni ixtisas açmaq üçün qrant təklifi hazırlaya və onu maliyyələşdirmək üçün təqdim edə bilər.

Layihənin əlaqələndirmə qrupunun rəhbəri demişdir ki, "Azərbaycan ali təhsil sistemində islahatlar layihəsi" ötən ilin sonunda hazır ola bilərdi. Amma bu layihəni ölkə Prezidentinin sərəncamı ilə ötən ildən hazırlanmağa başlanan Təhsil Strategiyasına uyğunlaşdırmaq məqsədilə onun tam hazırlanıb başa çatdırılması ilə bağlı ləngidilir. Fevralda Dünya Bankının təhsil missiyası Azərbaycana səfər edəcək. Səfər zamanı DB missiyası layihə ilə bağlı müzakirələr aparacaq və atılacaq növbəti addımlar dəqiqləşdiriləcəkdir.